Hakamlik sudiga murojaat qilish

Murojaat qilishning asosiy sharti

Nizoni hakamlik sudiga topshirish uchun taraflar o‘rtasida yozma hakamlik bitimi mavjud bo‘lishi kerak. U:

asosiy shartnomadagi hakamlik sharti;
alohida tuzilgan bitim;
taraflar o‘rtasidagi elektron xatlar yoki boshqa qayd etiladigan xabarlar almashinuvi shaklida rasmiylashtirilishi mumkin.

Agar nizo vakolatli davlat sudida ko‘rib chiqilayotgan bo‘lsa, taraflar sud hal qiluv qarori qabul qilguniga qadar hakamlik bitimini tuzishi mumkin.

Hakamlik bitimida nimalar bo‘lishi kerak

Bitimda:

taraflar o‘rtasida kelib chiqqan yoki kelib chiqishi mumkin bo‘lgan barcha yoxud muayyan nizolar hakamlik sudida ko‘rib chiqilishi;
nizo doimiy faoliyat ko‘rsatuvchi hakamlik sudiga berilsa, uning aniq va to‘liq nomi ko‘rsatilishi shart.

Taraflar qo‘shimcha ravishda hakamlik sudьyalarining soni, muhokama joyi va tili, qo‘llaniladigan qoidalar hamda nizoni ko‘rib chiqish muddatini belgilashi mumkin.

Muhim: Yozma shaklga yoki bitimning majburiy mazmuniga rioya qilinmasa, hakamlik bitimi haqiqiy emas deb hisoblanadi. Sud nomi noto‘g‘ri yoki noaniq ko‘rsatilishi ham bitimni qo‘llashda muammo keltirib chiqarishi mumkin.

Da’vo arizasining mazmuni

Da’vo hakamlik sudiga yozma ravishda beriladi. Arizada:

ariza tuzilgan sana;
yuridik shaxslarning nomi va pochta manzili;
jismoniy shaxslarning familiyasi, ismi, otasining ismi va yashash joyi;
da’vogarning talablari;
talablarga asos bo‘lgan holatlar;
talablarni tasdiqlovchi dalillar;
da’voning bahosi;
ilova qilinayotgan hujjatlar ro‘yxati ko‘rsatiladi.

Ariza da’vogar yoki uning vakili tomonidan imzolanadi. Vakil imzolagan bo‘lsa, uning vakolatini tasdiqlovchi ishonchnoma yoki boshqa hujjat ilova qilinadi. Da’vo arizasining nusxasi javobgarga yuboriladi.

Arizaga, nizoning xususiyatidan kelib chiqib, hakamlik bitimi, asosiy shartnoma, hisob-kitoblar, yozishmalar, to‘lov va boshqa dalillar hamda belgilangan to‘lov amalga oshirilganligini tasdiqlovchi hujjatlar ilova qilinadi.

Murojaatdan oldin tekshirish lozim bo‘lgan holatlar

Da’vogar:

nizo hakamlik sudida ko‘rilishi mumkinligini;
tanlangan sudning amalda faoliyat yuritayotganini;
da’vo muddati o‘tmaganini;
reglamentdagi to‘lov, hujjat va yuborish talablarini;
javobgarning to‘g‘ri va amaldagi manzilini tekshirishi kerak.

Murojaat qilish tartibi «Hakamlik sudlari to‘g‘risida»gi Qonun bilan belgilanadi.

Maqola foydali bo‘ldimi?

Bo‘limlar