Hakamlik sudida xarajatlar

Xarajatlar tarkibi

Nizoni hakamlik sudida hal qilish bilan bog‘liq xarajatlarga:

hakamlik sudьyalarining gonorari;
muhokamani tashkiliy va moddiy ta’minlash xarajatlari;
sudьyalarning yo‘l va muhokamada ishtirok etish xarajatlari;
ashyoviy, yozma va raqamli dalillarni turgan joyida ko‘zdan kechirish xarajatlari;
ekspert va tarjimonlarga to‘lanadigan summalar;
guvohlarning xarajatlari;
foydasiga qaror chiqarilgan taraf vakilining xizmat haqi;
hakamlik sudi belgilaydigan boshqa xarajatlar kiradi.

Hakamlik sudьyasining gonorari

Gonorar miqdori:

da’voning bahosi;
nizoning murakkabligi;
muhokamaga sarflangan vaqt;
ishning boshqa muhim holatlari asosida belgilanadi.

Doimiy faoliyat ko‘rsatuvchi hakamlik sudida gonorar sud qoidalaridagi shkala bo‘yicha hisoblanadi. Muvaqqat sudda uning miqdori taraflarning kelishuvi va ish holatlari asosida belgilanadi.

Hakamlik sudьyasining gonorariga qonunchilikka muvofiq soliq solinadi.

Xarajatlarni taraflar o‘rtasida taqsimlash

Avvalo taraflarning kelishuvi qo‘llaniladi. Bunday kelishuv bo‘lmasa, xarajatlar qanoatlantirilgan va rad etilgan talablarga mutanosib ravishda taqsimlanadi.

Vakil xizmatlari va boshqa sarflarni qarshi tarafdan undirish uchun:

xarajat qilinganligi hujjatlar bilan tasdiqlanishi;
uni qoplash haqidagi talab muhokama davomida bildirilishi;
talab hakamlik sudi tomonidan qanoatlantirilishi kerak.

Xarajatlarning taqsimlanishi hal qiluv qarorida yoki ajrimda ko‘rsatiladi.

Bo‘nak to‘lovi

Hakamlik sudi nizoni ko‘rib chiqishdan oldin xarajatlarni qoplash uchun da’vogardan bo‘nak kiritishni talab qilishi mumkin.

Muhim: Bo‘nak da’vo arizasi berilgan kundan e’tiboran 10 kun ichida to‘lanmasa, hakamlik sudi da’voni ko‘rmasdan qoldirish to‘g‘risida ajrim chiqarishi mumkin.

Xarajatlarning aniq miqdori yagona BHM miqdorida belgilanmaydi. U tanlangan hakamlik sudining reglamenti, tariflari va nizoning xususiyatiga bog‘liq.

Tartib «Hakamlik sudlari to‘g‘risida»gi Qonun bilan belgilanadi.

Maqola foydali bo‘ldimi?

Bo‘limlar