Aholiga suyultirilgan uglevodorod gazini etkazib berish tartibi

Suyultirilgan gaz kimlarga etkazib beriladi

Suyultirilgan uglevodorod gazi, asosan:

tabiiy gaz tarmog‘i mavjud bo‘lmagan;
tabiiy gaz bilan barqaror ta’minlanmagan;
belgilangan ro‘yxat va etkazib berish jadvaliga kiritilgan aholi hamda ijtimoiy soha ob’ektlariga etkazib beriladi.

Iste’molchi suyultirilgan gazdan shartnomada belgilangan maishiy maqsadda, asosan ovqat tayyorlash uchun foydalanishi kerak.

Ehtiyojni aniqlash

Gaz ta’minoti tashkilotlari iste’molchilar, mahalla va mahalliy hokimliklar ishtirokida joriy yilning 1-iyuliga qadar kelgusi yil uchun prognoz hajmini shakllantiradi.

Bunda bitta iste’molchiga oyiga kamida:

bitta maishiy gaz balloni;
ballonda 20 kilogramm suyultirilgan gaz etkazib berish hisobga olinadi.

Shartnoma tuzish

Gaz ta’minoti tashkiloti va iste’molchi o‘rtasida suyultirilgan gaz etkazib berish shartnomasi tuziladi.

Shartnomada:

iste’molchining manzili;
shaxsiy hisobvarag‘i;
etkazib berish shartlari;
taraflarning huquq va majburiyatlari;
to‘lov tartibi;
ballondan xavfsiz foydalanish shartlari ko‘rsatiladi.

Muhim: gaz ta’minoti tashkiloti va iste’molchi o‘rtasida shartnoma tuzmasdan suyultirilgan gaz yoki maishiy gaz ballonini etkazib berish va qabul qilish taqiqlanadi.

Etkazib berish

Suyultirilgan gaz:

maxsus avtotransport vositalarida;
tasdiqlangan jadval bo‘yicha;
maishiy ballonlarda, guruhli ballon qurilmalarida yoki maxsus sig‘imlarda etkaziladi.

Ballonda etkazilganda bo‘sh ballon to‘ldirilgan ballonga almashtiriladi. Texnik nosoz yoki texnik ko‘rikdan o‘tmagan ballonni gaz bilan to‘ldirish taqiqlanadi.

To‘lov

Iste’molchi haqiqatda etkazib berilgan suyultirilgan gaz uchun shartnoma asosida to‘lov qiladi.

To‘lov iste’molchining tanloviga ko‘ra to‘lov qabul qilish shoxobchalari yoki elektron tizimlar orqali amalga oshiriladi.

Gaz ta’minoti tashkiloti xodimining naqd pul qabul qilishiga yo‘l qo‘yilmaydi, onlayn nazorat-kassa mashinasi orqali rasmiy chek beriladigan holatlar bundan mustasno.

Gaz kam yoki kechiktirib etkazilsa

Iste’molchiga etkazilgan ballonda gaz miqdori 20 kilogrammdan kam bo‘lsa yoki etkazib berish tasdiqlangan jadvaldan asossiz kechiksa, iste’molchi:

gaz ta’minoti tashkilotiga;
«Hududgazta’minot» AJga;
iste’molchilar huquqlarini himoya qiluvchi organlarga murojaat qilishi mumkin.

Ballon qabul qilinayotganda uning og‘irligi, texnik holati, plombasы va to‘lov chekini tekshirish tavsiya etiladi.

Tartib Vazirlar Mahkamasining 646-son qarori bilan belgilangan.

Maqola foydali bo‘ldimi?

Bo‘limlar