Kassatsiya instantsiyasida ish yuritish

Kassatsiya shikoyati berish huquqi

Quyidagilar kassatsiya shikoyati berishga haqli:

ishda ishtirok etuvchi shaxslar;
ishga jalb qilinmagan, ammo huquq va majburiyatlari haqida sud qaror qabul qilgan shaxslar;
qonunda belgilangan hollarda Tadbirkorlik sub’ektlarining huquqlari va qonuniy manfaatlarini himoya qilish bo‘yicha vakil.

Kassatsiya shikoyati birinchi instantsiya sudining qonuniy kuchga kirgan va apellyatsiya tartibida ko‘rilmagan hal qiluv qarori ustidan beriladi.

Prokuror yoki yuqori turuvchi prokuror prokuror ishtirok etgan ish, prokurorning ishtiroki majburiy bo‘lgan, ammo u tegishli xabardor qilinmagan ish yoki manfaatdor shaxsning murojaati mavjud bo‘lgan holda kassatsiya protesti keltirishi mumkin.

Kassatsiya shikoyatini ko‘radigan sud

Tumanlararo iqtisodiy sudlar, Qoraqalpog‘iston Respublikasi sudi, viloyatlar va Toshkent shahar sudlarining hal qiluv qarorlari ustidan berilgan kassatsiya shikoyatlari tegishli hududiy sudning iqtisodiy ishlar bo‘yicha sudlov hay’ati tomonidan ko‘riladi.

Oliy sud birinchi instantsiyada qabul qilgan hal qiluv qarorlari ustidan berilgan kassatsiya shikoyatlari Oliy sudning Iqtisodiy ishlar bo‘yicha sudlov hay’ati tomonidan ko‘riladi.

Shikoyatni berish tartibi

Kassatsiya shikoyati kassatsiya instantsiyasi sudi nomiga yo‘llanadi, ammo hal qiluv qarorini qabul qilgan sudga topshiriladi.

Birinchi instantsiya sudi shikoyatni ish bilan birga u kelib tushgan kundan boshlab 5 kun ichida kassatsiya instantsiyasiga yuborishi shart.

Shikoyatda:

kassatsiya sudining nomi;
shikoyat beruvchi va boshqa ishtirokchilar haqidagi ma’lumotlar;
shikoyat qilinayotgan sud hujjati;
qarorning noto‘g‘riligiga asos bo‘lgan vajlar;
shikoyat beruvchining talabi;
ilova hujjatlar ro‘yxati ko‘rsatiladi.

Kassatsiya shikoyati berish muddati

Kassatsiya shikoyati hal qiluv qarori qonuniy kuchga kirgan kundan boshlab 6 oy ichida berilishi mumkin.

O‘tkazib yuborilgan muddat shikoyat beruvchining iltimosnomasiga ko‘ra tiklanishi mumkin. Buning uchun:

iltimosnoma kassatsiya muddati o‘tgan kundan boshlab 3 oy ichida berilishi;
muddatni o‘tkazib yuborish sabablari sud tomonidan uzrli deb topilishi kerak.

Muhim: Birinchi instantsiya qarori apellyatsiya tartibida ko‘rilgan bo‘lsa, u amaldagi tartibda kassatsiyaga emas, tegishli shartlar asosida taftish tartibida qayta ko‘rib chiqiladi.

Sud hujjati ijrosini to‘xtatish

Kassatsiya shikoyatining berilishi hal qiluv qarori ijrosini avtomatik ravishda to‘xtatmaydi.

Ishda ishtirok etuvchi shaxsning iltimosnomasiga ko‘ra kassatsiya sudi hal qiluv qarori ijrosini kassatsiya ishi yakunlanguniga qadar to‘xtatib turishi mumkin. Bu haqda shikoyatni ish yuritishga qabul qilish to‘g‘risidagi ajrimda ko‘rsatiladi.

Tartib O‘zbekiston Respublikasining Iqtisodiy protsessual kodeksi bilan belgilangan.

Maqola foydali bo‘ldimi?

Bo‘limlar