Nogironligi bo‘lgan shaxslar bandligini qo‘llab-quvvatlash choralari

Nogironligi bo‘lgan shaxslarning jamoat birlashmalariga qarashli tashkilotlar hamda nogironligi bo‘lgan yakka tartibdagi tadbirkorlarni davlat tomonidan qo‘llab-quvvatlash maqsadida qator imtiyoz va imkoniyatlar belgilangan.

Davlat buyurtmachilari bilan uzoq muddatli shartnomalar

Davlat buyurtmachilari o‘z ehtiyojidan kelib chiqib, ko‘rgazma-yarmarkalar davomida:

belgilangan talablarga javob beradigan yuridik shaxslar;
nogironligi bo‘lgan yakka tartibdagi tadbirkorlar

bilan ular tomonidan ishlab chiqariladigan tovarlar yoki ko‘rsatiladigan xizmatlarni uch yilgacha muddat davomida kafolatli xarid qilishni nazarda tutuvchi shartnomalar tuzishi mumkin.

Yagona reestr

Quyidagilar Yagona reestrga kiritiladi:

xodimlar umumiy sonining kamida 25 foizi, biroq kamida 4 nafari nogironligi bo‘lgan shaxslardan iborat yuridik shaxslar;
ushbu xodimlar tashkilotda kamida olti oydan buyon mehnat faoliyatini olib borayotgan bo‘lishi;
nogironligi bo‘lgan shaxslar mehnatiga haq to‘lash fondi tashkilotning umumiy mehnatga haq to‘lash fondining kamida 25 foizini tashkil etishi;
kamida olti oydan buyon faoliyat yuritayotgan nogironligi bo‘lgan yakka tartibdagi tadbirkorlar;
ular tomonidan ishlab chiqariladigan tovarlar va ko‘rsatiladigan xizmatlar.

Reestr Kambag‘allikni qisqartirish va bandlik vazirligining rasmiy veb-saytida hamda Yagona interaktiv davlat xizmatlari portalida yuritiladi va har oy yakunida yangilanadi.

Yuridik shaxslar va yakka tartibdagi tadbirkorlar Reestrga kirish uchun:

Yagona interaktiv davlat xizmatlari portali orqali;
Davlat xizmatlari markaziga shaxsan murojaat qilish orqali

ariza berishi mumkin.

Agar yuridik shaxs belgilangan xodimlar soni yoki mehnatga haq to‘lash fondi bo‘yicha talablarga javob bermasa, u Reestrdan avtomatik ravishda chiqariladi.

Subsidiya ajratishdagi engillik

Tadbirkorlik sub’ektlariga ish o‘rinlari va mehnat sharoitlarini nogironligi bo‘lgan shaxslarga moslashtirish xarajatlarini qoplash uchun subsidiya ajratishda, mazkur ish o‘rinlarining mehnat sharoitlari yuzasidan davlat ekspertizasi xulosasini talab qilish tartibi bekor qilingan.

Davlat xaridlarida kamida 10 foizlik xarid

Davlat xaridlari doirasida:

Sog‘liqni saqlash vazirligi;
Maktabgacha va maktab ta’limi vazirligi;
Ijtimoiy himoya milliy agentligi;
ularning tizimidagi tashkilotlar;
boshqa davlat buyurtmachilari

o‘z ehtiyojidan kelib chiqib, xarid reja-jadvalidagi tegishli xarid predmeti hajmining kamida 10 foizi miqdorida Reestrga kiritilgan korxonalar va nogironligi bo‘lgan yakka tartibdagi tadbirkorlar tomonidan ishlab chiqarilgan tovarlar yoki ko‘rsatiladigan xizmatlarni shartnoma asosida sotib oladi.

Davlat buyurtmachilari bunday xaridlar haqidagi ma’lumotlarni o‘zining yoki yuqori turuvchi tashkilotning rasmiy veb-saytida doimiy ravishda joylashtirib boradi.

Elektron kooperatsiya portali orqali to‘g‘ridan-to‘g‘ri shartnoma

Elektron kooperatsiya portalida Reestrga kiritilgan yuridik shaxslar va nogironligi bo‘lgan yakka tartibdagi tadbirkorlarning tovarlari va xizmatlari haqidagi ma’lumotlar aks ettiriladi.

Davlat buyurtmachilari ushbu portal orqali vositachilik yig‘imi undirilmagan holda elektron to‘g‘ridan-to‘g‘ri shartnomalar tuzishi mumkin.

«Imkoniyatlar markazi»

«Imkoniyatlar markazi»:

nogironligi bo‘lgan shaxslar va ish beruvchilar o‘rtasida muloqot maydoni sifatida faoliyat yuritadi;
nogironligi bo‘lgan shaxslarning huquqlari va qonuniy manfaatlarini himoya qilishga ko‘maklashadi;
ular bilan dastlabki suhbat o‘tkazib, qiziqishlaridan kelib chiqqan holda kasb-hunarga o‘qitishga ko‘maklashadi;
bandlik, madaniyat, san’at va sport yo‘nalishidagi faollikni qo‘llab-quvvatlaydi.

Normativ hujjatlar

Asos: O‘zbekiston Respublikasi Prezidentining 2022-yil 12 oktyabrdagi PQ–390-son qarori.