BILIM OLISh HUQUQI

fuqarolarning konstitutsiyaviy huquqlaridan biri bo‘lib, unga ko‘ra, har kim b.o.h.ga ega. O‘zbekistonda umumiy ta’lim olish bepul, ya’ni umumiy ta’lim olish uchun haq to‘lanmaydi. Umumiy ta’limga ega har bir kishi oliy va o‘rta maxsus ta’lim muassasalarida ta’lim olish huquqiga ega, bu ta’lim belgilangan sinovdan o‘tganlar uchun bepul, qolgan shaxslar pul to‘lash orqali bilim olishni davom ettirishlari mumkin. B.o.h. umumiy maktablar, akademik litseylar, kasb-hunar kollejlari, oliy o‘quv yurtlari faoliyati orqali ta’minlanadi. Bundan tashqari, aspirantura va doktoranturada ham bilim olish huquqi mavjud.