O‘zbekistonda farmatsevtika va biotexnologiya innovatsiyalarini rivojlantirishga yo‘naltirilgan eng yaxshi 10 ta ilmiy loyiha tanlab olindi

2025-yil 29-30-may kunlari Farmatsevtika tarmog‘ini rivojlantirish agentligida o‘tkazilgan ilmiy-amaliy yig‘ilish doirasida farmatsevtika va biotexnologiya fan yo‘nalishidagi ilmiy loyiha mavzularini saralab olish maqsadida tashkil etilgan maxsus Ilmiy kengash ishini yakunladi. 

Jami 53 ta ilmiy loyiha mavzusi Farmagentlikka taqdim etildi. Shundan 44 ta loyiha tashabbuskorlari ikki kun davomida Ilmiy kengash oldida o‘z mavzularini taqdimot qildilar. 

Yakuniy xulosalarga ko‘ra, 10 ta eng yuqori ball to‘plagan loyiha mavzusi Ilmiy kengash tomonidan tanlab olindi. Ushbu tanlab olingan mavzular bo‘yicha tez kunlarda Innovatsion rivojlanish agentligi tomonidan "Farmatsevtika va biotexnologiya" yo‘nalishida grant tanlovi e’lon qilinishi kutilmoqda. 

Tanlab olingan mavzular:  

• Smartfon bilan integratsiyalashgan faol nanotuzilmali qog‘ozli mikroflyuidik chiplar asosida, YuKRS (yuza kuchaytirilgan Raman spektroskopiya) bo‘yicha joyida o‘pka saratonini aniqlashga mo‘ljallangan diagnostikum yaratish.
• Dori vositalarini etkazib berish va diagnostika uchun polimer nanozarracha gibrid mikroignalarning klinik oldi sinovlarini o‘tkazish.
• O‘zbekistonda hayvonlar ustida olib boriladigan tahlillarga muqobil sifatida, mikrochiplar asosida standartlashtirilgan sferoid hujayra liniyalarini o‘stirish hamda dori vositalarini baholash uchun sinov protokollarini ishlab chiqish.
• Gepatit B va D uchun atrof-muhit sharoitlariga chidamli, MBP-qoplangan kvant nuqtali termostabil, smartfon integratsiyalangan diagnostika vositasini ishlab chiqish.
• Vabo qo‘zg‘atuvchisini aniqlash uchun O1 diagnostik zardobini olish texnologiyasini yaratish.
• Tirozin kinaza ingibitorlariga asoslangan selektiv ta’sirga ega molekulalarning sintezi, ularning saratonga qarshi faolligini baholash hamda substantsiya va qattiq dori shakli texnologiyasini ishlab chiqish.
• Onkogematologik kasalliklarni tashxislash uchun BCR-ABL1 p210 va JAK2 V617F mutatsiyalariga yo‘naltirilgan PZR diagnostikumlarini ishlab chiqish.
• Botulizmga qarshi antitoksik polivalent zardob tayyorlash texnologiyasini yaratish.
• Mahalliy o‘simliklar asosida diabetik yaralar uchun zamonaviy dori shakli – lipofilik-sprey ishlab chiqish.
• Qutirish kasalligiga qarshi ot qon zardobidan immunoglobulin tayyorlash texnologiyasini ishlab chiqish. 

Bundan tashqari, farmatsevtika va biotexnologiya sohalaridagi innovatsion loyihalarni qo‘llab-quvvatlashga qaratilgan navbatdagi tanlov uchun hujjat qabul qilish yaqin kunlarda boshlanishi rejalashtirilmoqda. 

Farmagentlik tomonidan ilmiy salohiyatni rag‘batlantirish va fan hamda ishlab chiqarish integratsiyasini mustahkamlashga qaratilgan bu kabi tashabbuslar izchil davom ettiriladi.