Majburiy ijro buyurolarining tegishli qarorlariga asosan tashkilot buxgalterlari tomonidan xodimning oyligining bir qismi undiruvga qaratiladi. Tashkilot buxgalterlari xodimning oyligining bir qismini undiruvga qaratishda barcha oladigan oyligidan hisoblagan holda undiruvga qaratadi.

Biroq shunday pul summalari bor buxgalter uni chegirib tashlagan holda undiruvga qaratish lozim. “Qarzdor jismoniy shaxsga ish haqi yoki unga tenglashtirilgan boshqa to‘lovlarni to‘layotgan tashkilotlar yoki boshqa shaxslar tomonidan ijro hujjatlarini ijro etish qoidalarini tasdiqlash haqida”gi Adliya vaziri buyrug‘iga (2009-yil 8-iyulda ro‘yxatdan o‘tkazilgan ro‘yxat raqami 1980) asosan:

⇒ mayib bo‘lganlik yoki sog‘liqqa boshqacha tarzda shikast etganlik, shuningdek boquvchisining vafot etganligi sababli ko‘rilgan zararni to‘lash summalariga;

⇒ xizmat majburiyatlarini bajarish chog‘ida mayib bo‘lgan (yaralangan, shikastlangan, kontuziyaga uchragan) shaxslarga va mazkur shaxslar halok bo‘lgan (vafot etgan) taqdirda ularning oila a’zolariga to‘lanadigan summalarga;

⇒ bola tug‘ilganligi munosabati bilan to‘lanadigan summalarga;

⇒ aliment majburiyatlari bo‘yicha to‘lanadigan summalarga;

⇒ mehnat sharoiti noqulay va o‘ziga xos bo‘lgan ishlar uchun to‘lanadigan summalarga, shuningdek radiatsiya ta’siriga uchragan shaxslarga va qonunchilik hujjatlarida belgilangan boshqa hollarda to‘lanadigan summalarga;

⇒ homiladorlik va tug‘ish bo‘yicha to‘lanadigan nafaqa summalariga;

⇒ dafn etish marosimi uchun beriladigan nafaqa summalariga;

⇒ qisman haq to‘lanadigan ta’til davrida bolani parvarishlash uchun to‘lanadigan summalarga;

⇒ bola tug‘ilishi, qarindoshlar vafot etishi, nikoh tuzish munosabati bilan korxona, muassasa yoki tashkilot tomonidan to‘lanadigan summalarga;

⇒ xizmat safari, boshqa joyga ishga o‘tkazilganligi, qabul qilinganligi yoki yuborilganligi munosabati bilan to‘lanadigan summalarga;

⇒ mehnatga oid munosabatlar bekor qilinganda ishdan bo‘shatish nafaqasi tariqasida to‘lanadigan summalarga.

Qarzdorning ish haqidan ushlab qolish miqdori

Qarzdorning ish haqidan ushlab qolinadigan miqdor soliqlar ushlab qolinganidan so‘ng qolgan summadan hisoblab chiqariladi.

Agar ijro hujjatida ish haqidan undirish miqdori ko‘rsatilmagan bo‘lsa, sud ijrochisi har bir alohida holatda undiruv miqdorini belgilashga haqli.

Axloq tuzatish ishlariga hukm qilingan shaxsdan ijro hujjatlari bo‘yicha undiruv sud hukmi yoki qaroriga ko‘ra amalga oshirilgan ushlab qolish summasini hisobga olmagan holda ish haqining to‘liq summasi hisobidan amalga oshirilishi lozim.

Jazoni ijro etish koloniyalarida, tarbiya koloniyalari va qamoqxonalarda jazo o‘tayotgan shaxslardan, shuningdek tibbiy yo‘sindagi majburlov choralarini ijro etuvchi muassasalarda saqlanayotgan shaxslardan undiruv butun ish haqidan, ish haqining ularning mazkur muassasalardagi ta’minoti bo‘yicha xarajatlarni qisman qoplash uchun ajratiladigan qismini ham qo‘shgan holda amalga oshiriladi.