Davlat uy-joy fondini xususiylashtirish tartibi qanday?

Davlat uy-joy fondini xususiylashtirish:

O‘zbekiston Respublikasining qonunchilik hujjatlarida belgilangan fuqarolarning ayrim toifalariga kvartiralarni, uylarni (uylarning bir qismini) tekinga berish;

davlat kvartiralarini, uylarini (uylarning bir qismini) O‘zbekiston Respublikasining – fuqarolariga va yuridik shaxslariga hamda fuqaroligi bo‘lmagan shaxslarga sotish yo‘li bilan amalga oshiriladi.

Fuqaro xususiylashtirish ishlarini amalga oshirish uchun tuman (shahar) hokimligiga, korxona, muassasa, tashkilot ma’muriyatlariga (mulkdorga) ariza bilan murojaat qilinadi.

Murojaatni ko‘rib chiqish muddati - 2 oygacha.

O‘zbekiston Respublikasining xususiylashtirish sub’ektlariga davlat uy-joy fondini xususiylashtirish huquqi faqat bir marta beriladi.

Turar joylarni xususiylashtirish davlat uy-joy fondining egasi yoki u vakolat bergan davlat boshqaruvi organi tomonidan amalga oshiriladi.

Xususiylashtirilishi mumkin bo‘lgan uy-joylar

▪️ ijara shartnomasi asosida fuqarolar foydalanilayotgan ko‘p kvartirali uylardagi kvartiralar;

▪️ qayta tiklash, ta’mirlanish ishlari tugallangan, ammo odamlar ko‘chib kirmagan va bo‘shatilgan uylarning kvartiralari;

▪️ yangi qurilgan uylardagi kvartiralar.

Xususiylashtirilmaydigan uy-joylar

▪️ yopiq harbiy shaharchalardagi uylarning kvartiralari;

▪️ uy-muzeylar, me’morchilik, tarix va madaniyat yodgorliklari hisoblanuvchi kvartira va uylar;

▪️ umumiy yotoqlarning xonalari;

▪️ belgilangan tartibda yashash uchun yaroqsiz deb topilgan kvartiralar;

▪️ xizmat kvartiralari, xonalari (uylari);

▪️ ikki va undan ziyod ijarachi yashab turgan kvartiralar agarda ularni xususiylashtirishda barcha ijarachilarning roziligi bo‘lmasa.

Qanday hujjatlar taqdim etish lozim?

▪️ xususiylashtirish to‘g‘risidagi qarorning (buyruqning) nusxasi;

▪️ uy-joyni xususiylashtirayotgan fuqaroning pasporti nusxasi;

▪️ uy daftarining nusxasi (kvartiralar bo‘yicha kartochkaning nusxasi (17-shakl);

▪️ fuqaroning imtiyozli asosda xususiylashtirish huquqini tasdiqlaydigan ma’lumotnoma.

Davlat uy-joy fondiga nimalar kiradi?

Davlat uy-joy fondi mahalliy davlat hokimiyati organlarining uy-joy fondi hamda davlat organlari, muassasalari va tashkilotlarining operativ boshqaruvidagi uy-joy fondidir.

Mehnatga qobiliyatsizlar, yolg‘iz qariyalar, pensionerlar va ularning oila a’zolariga, agar ularning jon boshiga to‘g‘ri keladigan o‘rtacha oylik daromadlari mehnatga haq to‘lash eng kam miqdorining 35,2 foizidan oz bo‘lsa, shuningdek birinchi marta nikohdan o‘tgan turar joyga muhtoj yosh oilalarga, O‘zbekiston Respublikasi Vazirlar Mahkamasi tomonidan belgilangan ro‘yxatga binoan fuqarolarning ijtimoiy himoyalanmagan va ta’minoti oz boshqa toifalariga mahalliy davlat hokimiyat organlari huzurida aniq maqsadga qaratilgan ijara shartnomasi talablari asosida xususiylashtirish huquqisiz foydalaniladigan kommunal uy-joy fondi tashkil etiladi.

Fuqarolarning alohida uy, kvartira va xonaga bo‘lgan egalik huquqi turar joy qiymati to‘liq to‘langan (sotib olingan) va order olingan paytdan boshlanadi.

Turar joyning haqini to‘lab va tekinga xususiylashtirilayotgan fuqarolarga uy-joy egasining qarori asosida egalik huquqini beruvchi yagona shaklda belgilangan davlat orderi beriladi.