O‘zbekiston Vazirlar Mahkamasining “Avtomobilь transportida yo‘lovchi tashish faoliyatini tartibga solish bo‘yicha qo‘shimcha chora-tadbirlar to‘g‘risida”gi Qarorida yo‘nalishsiz taksilardan foydalanish yuzasidan tartib belgilangan. Yo‘nalishsiz taksi sifatida foydalaniladigan har bir avtotransport vositasi texnik jihatdan soz holatda bo‘lishi va Avtomobilь transportida yo‘lovchilar va bagajni tashish qoidalarida belgilangan talablarga muvofiq bo‘lishi, shuningdek, quyidagi talablarga javob berishi kerak:

— ushbu Nizomning 6 va 7-bandlarida belgilangan yagona tanish belgilarining mavjud bo‘lishi;

— to‘lovlarni agregator yoki boshqa elektron to‘lov tizimlari orqali qabul qilish imkoniyati yaratilgan bo‘lishi;

— yo‘nalishsiz taksi texnik holati va jihozlarining yo‘l harakati xavfsizligini ta’minlash bo‘yicha qonunchilik hujjatlari talablariga muvofiq bo‘lishi;

— shahar yo‘nalishlarida avtotransport vositasining ekspluatatsiyasi 15 yildan ortiq bo‘lmasligi;

— tashuvchining fuqarolik javobgarligini majburiy sug‘urtasi mavjud bo‘lishi;

— taksometr funktsiyalarini ta’minlaydigan maxsus ilovaga ega moslamalar (shu jumladan, uyali telefonlar, planshetlar) bilan ta’minlangan bo‘lishi.

Shuni unutmangki, vagon tipidagi («Damas» va shu tipdagi) avtotransport vositalarida yo‘nalishsiz taksi sifatida yo‘lovchi tashish faoliyati bilan shug‘ullanish taqiqlanadi.

Jismoniy va yuridik shaxslarga tegishli yo‘nalishsiz taksilar sifatida foydalaniladigan hamda yagona tanish belgilari bilan jihozlangan avtotransport vositalarida yo‘lovchilarni olish va tushirish maqsadida «To‘xtash taqiqlangan» yo‘l belgisi amal qilish hududida yo‘lovchilarni tushirish-chiqarishga (yuklarni ortish-tushirishga) ruxsat etiladi.

Yuridik shaxslarga tegishli yo‘nalishsiz taksilar sifatida foydalaniladigan hamda yagona tanish belgilari bilan jihozlangan avtotransport vositalariga:

— yo‘lovchilarni olish va tushirish maqsadida «To‘xtash taqiqlangan» yo‘l belgisi amal qilish hududida, shu jumladan, aeroport va vokzallarga tutash hududlarda to‘xtash;

— aeroportlar, temir yo‘l vokzallari, avtovokzallar, ustav fondida (ustav kapitalida) davlat ulushi 50 foiz va undan ortiq bo‘lgan qurilish mollari, dehqon va buyum bozorlari hamda savdo majmualarining pulli to‘xtash joylariga yo‘lovchilarni olish va tushirish uchun bepul kirish;

— yo‘nalishli transport vositalari uchun ajratilgan maxsus harakatlanish yo‘lagi bo‘ylab harakatlanish huquqi beriladi.

Mazkur band ushbu Nizomning 6 va 7-bandlarida belgilangan yagona tanish belgilari bilan jihozlanmagan, yo‘lovchilarni buyurtma asosida tashishda foydalaniladigan hamda litsenziya varaqasiga ega bo‘lmagan engil avtotransport vositalariga nisbatan tatbiq etilmaydi.

Yo‘nalishsiz taksilar haydovchilariga qo‘yiladigan talablar

Yo‘lovchilar tashish uchun mo‘ljallangan yo‘nalishsiz taksilarni boshqarishga haydovchilik guvohnomasida «V» toifasi bo‘lgan, 21 yoshga to‘lgan, tibbiy ko‘rikdan o‘tgan va kamida uch yillik haydovchilik stajiga ega hamda O‘zbekiston Respublikasi fuqarosi bo‘lgan shaxslar qo‘yiladi.

Haydovchi faoliyatini mehnat va dam olish rejimiga rioya etgan holda amalga oshiradi.

Amalga oshirilishi uchun litsenziya berilgan faoliyat turi bilan faqat shu litsenziyani olgan jismoniy yoki yuridik shaxs shug‘ullanishi mumkin. Litsenziyalarni yoki ularga doir huquqlarni boshqa shaxslarga berish taqiqlanadi.

Yuridik shaxslarga tegishli yo‘nalishsiz taksilarning haydovchilari ishlayotganda tegishli litsenziya varaqasiga hamda yo‘lga chiqishdan oldin avtotransport vositasining belgilangan tartibda texnik ko‘rikdan va haydovchilarning tibbiy ko‘rikdan o‘tkazilganligi to‘g‘risida yo‘l varaqasiga ega bo‘lishi shart.