O‘zbekistonda pasport va ID-kartani yo‘qotganlik uchun jarimani bekor qilish taklif etildi

Pasport yoki ID-kartani yo‘qotish va yaroqsiz holga keltirish uchun qo‘llaniladigan jarima o‘rniga davlat bojini oshirilgan miqdorda undirish taklif etilmoqda.

Prezident qaroriga ko‘ra, O‘zbekistonda pasport yoki ID-kartani yo‘qotganlik uchun ma’muriy javobgarlikni bekor qilish taklif etilmoqda.

Hujjatga muvofiq, quyidagi holatlarda yangi hujjat ma’muriy javobgarlikka tortmasdan rasmiylashtirilishi rejalashtirilgan:

O‘zbekiston fuqarosi pasport, ID-karta yoki xorijga chiqish uchun biometrik pasportni yo‘qotgan yoki yaroqsiz holga keltirgan bo‘lsa;
O‘zbekistonda doimiy yashovchi fuqaroligi bo‘lmagan shaxs ID-karta (yashash guvohnomasi) yoki yo‘l hujjatini yo‘qotgan yoki yaroqsiz holga keltirgan bo‘lsa;
O‘zbekistonda doimiy yashovchi xorijiy fuqaro ID-karta (yashash guvohnomasi)ni yo‘qotgan yoki yaroqsiz holga keltirgan bo‘lsa.

Bunday holatlarda yangi hujjat ma’muriy jazo qo‘llanilmagan holda, ammo davlat boji oshirilgan miqdorda to‘langanidan so‘ng berilishi taklif etilmoqda.

Ichki ishlar vazirligi hamda Adliya vazirligiga joriy yilning oktyabrь oyiga qadar mazkur masala yuzasidan tegishli takliflarni Vazirlar Mahkamasiga kiritish topshirildi.

Eslatib o‘tamiz, amaldagi tartibga ko‘ra, pasport yoki ID-kartani yo‘qotganlik uchun 1 BHM miqdorida jarima belgilangan.

Maqola foydali bo‘ldimi?

Bo‘limlar