Temir yo‘lda bemorlar va mayitlarni tashish

Izolyatsiya talab etiladigan bemorni tashish

Izolyatsiya talab etiladigan bemor temir yo‘lda:

kuzatuvchi shaxs hamrohligida;
boshqa yo‘lovchilardan ajratilgan kupeda;
kupedagi barcha joylar qiymati to‘langan holda tashiladi.

Kupeda bemor va kuzatuvchilarning haqiqiy sonidan qat’i nazar, barcha joylar uchun to‘liq haq to‘lanadi.

Alohida kupe tayyorlanishi uchun tashishni tashkil qilayotgan jismoniy yoki yuridik shaxs poezd jo‘nashidan kamida 5 kun oldin talabnoma berishi kerak.

Sanitariya talablari

Bemorni tashish hududiy sanitariya-epidemiologiya xizmati xabardor qilingan holda va sanitariya-epidemiologiya me’yorlariga muvofiq tashkil etiladi.

Bemor uchun ajratilgan kupe:

vagonning ishlamaydigan tamburi tomonidagi eng chekka kupe bo‘lishi;
bemor va kuzatuvchi uchun vagonning shu tomonidagi sanitariya uzeli biriktirilishi kerak.

Yo‘l davomida bemorning kupedan chiqishi, kuzatuvchining esa vagondan tashqariga, jumladan vagon-restoran yoki kupe-bufetga chiqishiga yo‘l qo‘yilmaydi.

Mayitni tashish

Mayit solingan tobut:

bagaj yoki pochta-bagaj vagonida yoxud ularning tegishli bo‘lmasida;
yo‘lda boshqa vagonga qayta ortmasdan;
kuzatuvchi shaxs hamrohligida tashiladi.

Tobutni jo‘nash stantsiyasiga topshirishda tegishli vakolatli organning tashishga ruxsatnomasi taqdim etilishi kerak.

Mayit solingan tobut kuzatuvchisiz tashishga qabul qilinmaydi. Kuzatuvchi yo‘lovchi poezdida boradi va alohida yo‘lovchi chiptasiga ega bo‘lishi shart.

Tobutga qo‘yiladigan talablar

Mayitning jasadi:

puxta kavsharlangan metall tobutga;
metall tobut esa yog‘och qutiga joylashtirilishi kerak.

Yog‘och qutidagi bo‘sh joylar qipiq, ko‘mir, torf, ohak yoki boshqa tegishli material bilan to‘ldiriladi.

Tashish haqi

Mayit solingan tobutni bagaj yoki pochta-bagaj vagonida tashish uchun haq 300 kilogramm bagaj tarifi bo‘yicha hisoblanadi.

Xok solingan urnani bagaj vagonida tashish uchun haq 100 kilogramm bagaj tarifi bo‘yicha hisoblanadi.

Agar kuzatuvchi yo‘lda poezddan qolib ketsa, tobutni belgilangan manzilga etkazish to‘xtatib turilmaydi.

Bemorlar va mayitlarni temir yo‘lda tashish tartibi Vazirlar Mahkamasining 2012-yil 13-apreldagi 109-son qarori bilan belgilangan.

Maqola foydali bo‘ldimi?

Bo‘limlar