2027-yil 1-yanvardan tadbirkorlar tovarlarni import qilishda to‘lanishi lozim bo‘lgan qo‘shilgan qiymat solig‘ini (QQS) tovarlar va xizmatlarni realizatsiya qilish bo‘yicha soliq organlarida mavjud ortiqcha QQS mablag‘lari hisobidan qoplash imkoniyatiga ega bo‘ladi. Jarayon soliq va bojxona organlarining axborot tizimlari orqali avtomatik amalga oshiriladi.

Iqtisodiyot va moliya vazirligi hamda Soliq qo‘mitasining qarori bilan “Tovarlarni import qilishda va tovarlarni (xizmatlarni) realizatsiya qilishda to‘lanadigan qo‘shilgan qiymat solig‘i summalarini o‘zaro hisobga olish tartibi to‘g‘risida”gi nizom tasdiqlandi.

Mazkur hujjat Adliya vazirligi tomonidan 2026-yil 31-oktabrda 3966-son bilan davlat ro‘yxatidan o‘tkazildi.

Ortiqcha QQS importdagi soliq to‘loviga yo‘naltiriladi

Yangi tartibga ko‘ra, soliq to‘lovchining tovarlar yoki xizmatlarni realizatsiya qilish natijasida soliq organlarida shakllangan QQS bo‘yicha ortiqcha to‘lovi mavjud bo‘lsa, ushbu mablag‘ tovarlarni import qilishda bojxona organlariga to‘lanishi lozim bo‘lgan QQS summasiga hisobga olinishi mumkin.

Ya’ni tadbirkor soliq organlarida turgan ortiqcha QQS mablag‘ini import vaqtida yana alohida mablag‘ ajratmasdan, bojxonadagi QQS majburiyatini qoplashga yo‘naltirishi mumkin bo‘ladi.

O‘zaro hisobga olish qanday amalga oshiriladi?

Jarayon quyidagi tartibda amalga oshiriladi.

Soliq to‘lovchi QQS summalarini soliq va bojxona organlarida o‘zaro hisobga olish istagini bojxona yuk deklaratsiyasida ko‘rsatadi.

Shundan so‘ng Bojxona qo‘mitasi importda to‘lanishi lozim bo‘lgan QQSni qoplash uchun soliq organlarida ortiqcha to‘lov mavjudligini tasdiqlash maqsadida Soliq qo‘mitasiga elektron so‘rov yuboradi.

Soliq qo‘mitasi bojxonaga hisobga olinishi mumkin bo‘lgan QQS summasi haqida ma’lumot taqdim etadi. Shu bilan bir vaqtda o‘zaro hisobga olish dalolatnomasi avtomatik ravishda shakllantiriladi.

Bojxona qo‘mitasi esa dalolatnomada ko‘rsatilgan summani soliq to‘lovchining bojxona organlaridagi shaxsiy hisobvarag‘ida aks ettiradi va bojxona yuk deklaratsiyasini rasmiylashtiradi.

Barcha axborot almashinuvi soliq va bojxona organlari o‘rtasida elektron shaklda amalga oshiriladi.

Tadbirkor uchun qanday qulaylik yaratiladi?

Yangi mexanizm import bilan shug‘ullanuvchi tadbirkorlarning aylanma mablag‘lariga tushadigan yukni kamaytirishga xizmat qiladi.

Masalan, tadbirkorning soliq organlarida QQS bo‘yicha ortiqcha mablag‘i turgan bo‘lsa, u import paytida xuddi shu summa uchun yana alohida pul topib, bojxonaga QQS to‘lashi shart bo‘lmaydi. Mavjud ortiqcha mablag‘ belgilangan tartibda importdagi QQS majburiyatiga hisobga olinadi.

Muhim: mazkur tartib 2026-yil 31-oktabrda davlat ro‘yxatidan o‘tkazilgan bo‘lsa-da, u 2027-yil 1-yanvardan kuchga kiradi.

Huquqiy asos: Iqtisodiyot va moliya vazirligi hamda Soliq qo‘mitasining “Tovarlarni import qilishda va tovarlarni (xizmatlarni) realizatsiya qilishda to‘lanadigan qo‘shilgan qiymat solig‘i summalarini o‘zaro hisobga olish tartibi to‘g‘risidagi nizomni tasdiqlash haqida”gi qarori (Adliya vazirligida 2026-yil 31-oktabrda 3966-son bilan davlat ro‘yxatidan o‘tkazilgan).