Ҳукумат қарори (549-сон, 29.08.2025 й.) билан “Қишлоқ хўжалиги техникаси ва лазерли қурилмага эга автоматлаштирилган ер текислагич агрегати қийматининг бир қисмини қоплаш учун субсидия ажратишни рақамлаштириш тартиби тўғрисида”ги низом тасдиқланди. 

Низом қишлоқ хўжалиги техникаси ва лазерли қурилмага эга автоматлаштирилган ер текислагич агрегати қийматининг бир қисмини қоплаш учун “Subsidiya.mf.uz” ахборот портали орқали субсидия ажратиш ҳамда ундан самарали фойдаланишни назорат қилиш тартибини белгилайди.

Низомга кўра, харидор субсидия олишга ариза бериш учун “Subsidiya.mf.uz” ахборот порталида Ягона идентификация тизими (Оne ID) ёки электрон рақамли имзо (ЭРИ) орқали рўйхатдан ўтади.

Қишлоқ хўжалигини давлат томонидан қўллаб-қувватлаш жамғармасида субсидия ажратишни кўриб чиқувчи комиссия тузилади.

Комиссия “Subsidiya.mf.uz” ахборот портали орқали келиб тушган ариза ва унга илова қилинган ҳужжатларни 5 иш кунида ўрганиб чиқади.

Харидор “Subsidiya.mf.uz” ахборот портали орқали ўзига субсидия ажратиш маъқуллангани ёки рад этилгани тўғрисида маълумотга эга бўлиши мумкин.

Маълумот учун: субсидия – белгиланган техникани сотиб олган харидорнинг аризасига мувофиқ қишлоқ хўжалиги техникаси қийматининг 15 фоизи, лазерли ер текислагич агрегати қийматининг 30 фоизини қоплаш учун ажратиладиган маблағ ҳисобланади.

Ҳужжатнинг расмий тўлиқ матни: lex.uz