“Коррупцияга қарши курашиш соҳасида фуқаролик жамияти институтларининг иштирокини янада кенгайтириш ва илмий тадқиқотларни қўллаб-қувватлаш чора-тадбирлари тўғрисида”ги Президент қарори (ПҚ–288-сон, 19.09.2025 й.) қабул қилинди.

Қарорга кўра, БМТнинг Коррупцияга қарши конвенцияси қоидаларининг бажарилишини мониторинг қилишга нодавлат нотижорат ташкилотлар жалб этилиб, улар томонидан муқобил баҳолаш тизими йўлга қўйилади. 

Шунингдек, Коррупцияга қарши курашиш агентлиги ҳар йили 1 апрелгача Коррупцияга қарши курашиш бўйича миллий кенгашга қуйидагиларни киритиб боради:

♦ ННТларнинг коррупцияга қарши курашиш йўналишидаги лойиҳалари ва уларни тегишли давлат органлари ва ташкилотлари томонидан молиялаштириш юзасидан таклифлар;

♦ коррупцияга қарши курашишда фуқаролик жамияти институтларининг иштироки, жумладан, улар томонидан амалга оширилган лойиҳа, тадқиқот ва ўрганишлар тўғрисида ахборот.

Бундан ташқари, Ўзбекистон нодавлат нотижорат ташкилотлари миллий ассоциацияси, “Юксалиш” ҳаракати ва “Ижтимоий фикр” республика жамоатчилик фикрини ўрганиш марказининг улар муассислигида  “Коррупцияга қарши курашиш муаммолари бўйича минтақавий тадқиқот маркази” нодавлат нотижорат ташкилоти ташкил этилади.

Аҳолининг, айниқса, ёшлар, фуқаролик жамияти институтларининг коррупцияга қарши курашишдаги фаоллигини ошириш, жамиятда ушбу иллатга қарши муросасиз муносабатни шакллантириш масалаларини тадқиқ этиш Марказнинг асосий вазифаларидан бири этиб белгиланди.