Global Peace Index 2026 натижаларига кўра, Ўзбекистон 163 давлат орасида 37-ўринни эгаллаб, Марказий Осиё мамлакатлари орасида энг юқори натижани қайд этди. Мамлакатнинг умумий кўрсаткичи 1,726 баллни ташкил қилди.

Institute for Economics & Peace (IEP) эълон қилган Global Peace Index 2026 рейтингида Ўзбекистон дунё бўйича 37-ўриндан жой олди. Индекс жами 163 давлат ва ҳудудни қамраб олади.

Ўзбекистоннинг натижаси 1,726 балл бўлди. GPI методологиясида балл қанчалик паст бўлса, мамлакатнинг тинчлик даражаси шунчалик юқори ҳисобланади.

Марказий Осиё давлатлари орасида энг юқори ўрин Ўзбекистонга тегишли — 37-ўрин. Қозоғистон 44, Тожикистон 47, Қирғизистон 61, Туркманистон эса 66-ўринни эгаллаган.

Шу тариқа, Ўзбекистон минтақадаги барча қўшни давлатларни ортда қолдирган. Айни пайтда IEP Ўзбекистонни Шарқий Европа ва Марказий Осиёни қамраб олган кенгроқ минтақада Болгариядан кейин иккинчи ўринга жойлаштирган.

Жаҳон рейтингида Исландия 19 йилдан бери биринчи ўринни сақлаб келмоқда. Кейинги ўринларни Янги Зеландия, Швейцария, Словения ва Ирландия эгаллаган. Рейтингнинг сўнгги ўрнида Россия қайд этилган, ундан олдин Судан, Конго Демократик Республикаси, Украина ва Исроил жойлашган.

Global Peace Index мамлакатлардаги вазиятни 23 та сифат ва миқдорий кўрсаткич асосида баҳолайди. Улар жамоат хавфсизлиги, давом этаётган ички ва халқаро можаролар ҳамда милитаризация даражаси каби уч асосий йўналишга бирлаштирилган.

2026 йилги ҳисобот умумжаҳон миқёсида вазият салбий томонга ўзгараётганини ҳам кўрсатди. Ўтган бир йилда глобал тинчлик даражаси 0,7 фоизга пасайган. 163 давлатдан 99 тасида кўрсаткич ёмонлашган, 62 тасида эса яхшиланган.

Маълумот учун, 2025 йилги Global Peace Index нашрида Ўзбекистон 1,926 балл билан 67-ўринда қайд этилган эди.