Sudlanganlik holatini olib tashlash

Sudlanganlik nima?

Sudlanganlik — shaxsning jinoyat sodir etgani uchun hukm qilinganidan kelib chiqadigan huquqiy holat. U jazo tayinlangan ayblov hukmi qonuniy kuchga kirgan kundan boshlanadi.

Sud tomonidan jazodan ozod qilingan shaxs sudlanmagan deb hisoblanadi.

Sudlanganlik qachon avtomatik tugallanadi?

Sudlanganlik holati:

shartli hukmda — sinov muddati tugagach;
majburiy jamoat ishlari, xizmat bo‘yicha cheklash yoki intizomiy qismga jo‘natish jazosi o‘talganidan keyin;
jarima ijro etilganidan, muayyan huquqdan mahrum qilish yoki axloq tuzatish ishlari o‘talganidan keyin bir yil o‘tgach;
ozodlikni cheklash jazosi o‘talganidan keyin ikki yil o‘tgach;
besh yilgacha ozodlikdan mahrum qilish jazosi o‘talganidan keyin to‘rt yil o‘tgach;
besh yildan ortiq, ammo o‘n yildan ko‘p bo‘lmagan ozodlikdan mahrum qilish jazosi o‘talganidan keyin etti yil o‘tgach;
o‘n yildan ortiq, ammo o‘n besh yildan ko‘p bo‘lmagan ozodlikdan mahrum qilish jazosi o‘talganidan keyin o‘n yil o‘tgach tugallanadi.

Muddat asosiy va qo‘shimcha jazolar to‘liq o‘talgan yoki ijro etilgan kundan hisoblanadi.

Sudlanganlik muddatidan ilgari qanday olib tashlanadi?

Ozodlikdan mahrum qilish jazosini o‘tab chiqqan shaxsga nisbatan ma’muriy jazo yoki intizomiy ta’sir chorasi qo‘llanilmagan bo‘lsa, sud Jinoyat kodeksining 78-moddasidagi tegishli muddatning kamida yarmi o‘tganidan keyin sudlanganlikni olib tashlashi mumkin.

Iltimosnomani:

jazoni o‘tab bo‘lgan shaxs;
uning himoyachisi yoki qonuniy vakili;
jamoat birlashmasi;
jamoa shaxsning yashash joyidagi tuman yoki shahar sudiga berishi mumkin.

Iltimosnoma kim haqida berilgan bo‘lsa, o‘sha shaxsning sud majlisida qatnashishi shart. Iltimosnoma rad etilsa, qayta murojaat ajrim chiqarilganidan kamida bir yil o‘tgach berilishi mumkin.

Muhim: sudlanganlikning tugallanishi yoki olib tashlanishi shaxsni reabilitatsiya qilishni anglatmaydi. Biroq shu paytdan boshlab shaxs sudlanmagan hisoblanadi va sudlanganlik bilan bog‘liq huquqiy oqibatlar bekor bo‘ladi.

Tartib Jinoyat-protsessual kodeksining 544-moddasida belgilangan. Sudlanganlik afv etish asosida ham PF–5439-son Farmondagi tartib bo‘yicha olib tashlanishi mumkin.

Maqola foydali bo‘ldimi?

Bo‘limlar