Jarima tariqasidagi jazoni ijro etish

Jarimani ixtiyoriy to‘lash

Jinoyat-ijroiya kodeksiga muvofiq, jarima tariqasidagi jazoga hukm qilingan shaxs jarimani hukm qonuniy kuchga kirgan kundan boshlab bir oy ichida ixtiyoriy ravishda to‘lashi shart.

Jinoyatni 18 yoshga to‘lmasdan sodir etgan shaxs jarimani hukm qonuniy kuchga kirgan kundan boshlab olti oy ichida to‘laydi.

Jarima belgilangan muddatda to‘lanmasa, voyaga etgan mahkumga nisbatan u davlat ijrochisi tomonidan «Sud hujjatlari va boshqa organlar hujjatlarini ijro etish to‘g‘risida»gi Qonun asosida majburiy undiriladi.

To‘lovni kechiktirish yoki bo‘lib-bo‘lib to‘lash

Mahkum jarimani to‘liq va belgilangan muddatda to‘lash imkoniyatiga ega bo‘lmasa, sudga asoslantirilgan iltimosnoma berishi mumkin.

Sud Jinoyat-protsessual kodeksining 533-moddasi asosida jarimani to‘lashni olti oygacha kechiktirishi yoki bo‘lib-bo‘lib to‘lashga ruxsat berishi mumkin.

Iltimosnomaga og‘ir moddiy ahvolni tasdiqlovchi hujjatlar, jumladan daromad, oila tarkibi, davolanish xarajatlari va boshqa muhim holatlarga oid ma’lumotlarni ilova qilish maqsadga muvofiq.

Muhim: kechiktirish yoki bo‘lib-bo‘lib to‘lash avtomatik ravishda berilmaydi. Bu masalani mahkumning holatini hisobga olgan holda sud hal qiladi.

Jarima to‘lashdan bo‘yin tovlash

Jinoyat kodeksining 44-moddasiga muvofiq, quyidagi holatlarda jarimaning to‘lanmagan qismi sud tomonidan boshqa jazoga almashtirilishi mumkin:

majburiy ijro uchun belgilangan muddatda jarimani to‘lashdan bo‘yin tovlansa;
undiruv qaratilishi mumkin bo‘lgan mol-mulk mavjud bo‘lmasa;
kechiktirish muddati tugaganidan keyin jarima to‘lanmasa;
bo‘lib-bo‘lib to‘lash shartlari buzilsa.

Jarima majburiy jamoat ishlari, axloq tuzatish ishlari, xizmat bo‘yicha cheklash, ozodlikni cheklash yoki ozodlikdan mahrum qilish bilan almashtirilishi mumkin.

Voyaga etmagan shaxsga tayinlangan jarimani almashtirishda Jinoyat kodeksining 82-moddasidagi maxsus qoidalar qo‘llaniladi.