Mahkumlarning uchrashuvlari, masofali aloqasi va jo‘natmalari

Kak jenщinы popadayutsya na ulovki zaklyuchennыx

Qisqa va uzoq muddatli uchrashuvlar

Ozodlikdan mahrum etilgan mahkumlarga qisqa va uzoq muddatli uchrashuvlar beriladi. Ularning soni muassasaning rejim turi va mahkum saqlanayotgan sharoitga qarab belgilanadi.

Qisqa muddatli uchrashuv to‘rt soatgacha davom etadi. Mahkum qarindoshlari bilan uchrashishi mumkin, boshqa shaxs bilan uchrashuv esa muassasa boshlig‘ining ruxsati asosida beriladi.

Uzoq muddatli uchrashuv yaqin qarindoshlar bilan birga yashash huquqi asosida:

muassasa hududida — bir sutkadan uch sutkagacha;
qonunda nazarda tutilgan hollarda muassasa hududidan tashqarida — uch sutkadan besh sutkagacha beriladi.

Mahkumning iltimosiga ko‘ra uzoq muddatli uchrashuv qisqa muddatli uchrashuvga, masofali video-uchrashuvga yoki telefon orqali so‘zlashuvga almashtirilishi mumkin. Qisqa muddatli uchrashuv ham masofali video-uchrashuvga yoki telefon orqali so‘zlashuvga almashtiriladi.

Masofali video-uchrashuv va telefon orqali so‘zlashuv

Mahkum o‘ziga ajratilgan huquq doirasida masofali video-uchrashuv yoki telefon orqali so‘zlashuvdan birini tanlaydi.

Umumiy, qattiq va maxsus tartibli koloniyalarda, tarbiya koloniyalarida, turmalarda hamda ixtisoslashgan kasalxonalarda bunday aloqa:

muassasa ma’muriyati nazorati ostida o‘tkaziladi;
haqi mahkumning shaxsiy hisobvarag‘idan to‘lanadi;
soni muassasa rejimi va saqlash sharoitiga qarab belgilanadi.

Mahkum muassasaga etib kelganidan keyin, shuningdek alohida hollarda uning iltimosiga ko‘ra qo‘shimcha masofali video-uchrashuv yoki telefon orqali so‘zlashuvga ruxsat berilishi mumkin.

Intizomiy bo‘linmada saqlanayotgan mahkumga bunday aloqa faqat alohida hollarda beriladi.

Muhim: ozodlikdan mahrum etish joylarida saqlanayotgan ikki mahkumning bir-biri bilan masofali video-uchrashuv o‘tkazishi yoki telefon orqali so‘zlashishi taqiqlanadi.

Posilka, yo‘qlov va banderollar

Mahkum muassasaga etib kelgan kundan boshlab posilka, yo‘qlov va banderollar olishi hamda jo‘natishi mumkin. Barcha jo‘natmalar ko‘zdan kechiriladi.

Ularning soni muassasa rejimi va saqlash sharoitiga qarab belgilanadi. Og‘irligi esa pochta qoidalarida belgilangan normadan oshmasligi kerak.

Homilador ayollar, jazoni ijro etish muassasasidagi bolalar uyida farzandi bor ayollar, kasalligi tufayli kuchaytirilgan ovqatga muhtoj shaxslar hamda I yoki II guruh nogironligi bo‘lgan shaxslarga tibbiy xulosa asosida qo‘shimcha jo‘natmalar olishga ruxsat berilishi mumkin.

Pul jo‘natmalari va yozishmalar

Mahkumlar cheklanmagan miqdorda pul jo‘natmalarini olishi mumkin. Yaqin qarindoshlarga pul yuborishga ruxsat etiladi. Boshqa shaxslar yoki tashkilotlarga pul yuborish uchun muassasa ma’muriyatining ruxsati talab qilinadi.

Mahkumlar cheklanmagan miqdorda xat va telegrammalar olishi hamda yuborishi mumkin. Yozishmalarni jo‘natish xarajatlari mahkumning shaxsiy mablag‘lari hisobidan to‘lanadi.

Tartib O‘zbekiston Respublikasining Jinoyat-ijroiya kodeksi va jazoni ijro etish muassasalarining ichki tartib qoidalari bilan belgilanadi.