Маҳкумларнинг учрашувлари, масофали алоқаси ва жўнатмалари

Как женщины попадаются на уловки заключенных

Қисқа ва узоқ муддатли учрашувлар

Озодликдан маҳрум этилган маҳкумларга қисқа ва узоқ муддатли учрашувлар берилади. Уларнинг сони муассасанинг режим тури ва маҳкум сақланаётган шароитга қараб белгиланади.

Қисқа муддатли учрашув тўрт соатгача давом этади. Маҳкум қариндошлари билан учрашиши мумкин, бошқа шахс билан учрашув эса муассаса бошлиғининг рухсати асосида берилади.

Узоқ муддатли учрашув яқин қариндошлар билан бирга яшаш ҳуқуқи асосида:

муассаса ҳудудида — бир суткадан уч суткагача;
қонунда назарда тутилган ҳолларда муассаса ҳудудидан ташқарида — уч суткадан беш суткагача берилади.

Маҳкумнинг илтимосига кўра узоқ муддатли учрашув қисқа муддатли учрашувга, масофали видео-учрашувга ёки телефон орқали сўзлашувга алмаштирилиши мумкин. Қисқа муддатли учрашув ҳам масофали видео-учрашувга ёки телефон орқали сўзлашувга алмаштирилади.

Масофали видео-учрашув ва телефон орқали сўзлашув

Маҳкум ўзига ажратилган ҳуқуқ доирасида масофали видео-учрашув ёки телефон орқали сўзлашувдан бирини танлайди.

Умумий, қаттиқ ва махсус тартибли колонияларда, тарбия колонияларида, турмаларда ҳамда ихтисослашган касалхоналарда бундай алоқа:

муассаса маъмурияти назорати остида ўтказилади;
ҳақи маҳкумнинг шахсий ҳисобварағидан тўланади;
сони муассаса режими ва сақлаш шароитига қараб белгиланади.

Маҳкум муассасага етиб келганидан кейин, шунингдек алоҳида ҳолларда унинг илтимосига кўра қўшимча масофали видео-учрашув ёки телефон орқали сўзлашувга рухсат берилиши мумкин.

Интизомий бўлинмада сақланаётган маҳкумга бундай алоқа фақат алоҳида ҳолларда берилади.

Муҳим: озодликдан маҳрум этиш жойларида сақланаётган икки маҳкумнинг бир-бири билан масофали видео-учрашув ўтказиши ёки телефон орқали сўзлашиши тақиқланади.

Посилка, йўқлов ва бандероллар

Маҳкум муассасага етиб келган кундан бошлаб посилка, йўқлов ва бандероллар олиши ҳамда жўнатиши мумкин. Барча жўнатмалар кўздан кечирилади.

Уларнинг сони муассаса режими ва сақлаш шароитига қараб белгиланади. Оғирлиги эса почта қоидаларида белгиланган нормадан ошмаслиги керак.

Ҳомиладор аёллар, жазони ижро этиш муассасасидаги болалар уйида фарзанди бор аёллар, касаллиги туфайли кучайтирилган овқатга муҳтож шахслар ҳамда I ёки II гуруҳ ногиронлиги бўлган шахсларга тиббий хулоса асосида қўшимча жўнатмалар олишга рухсат берилиши мумкин.

Пул жўнатмалари ва ёзишмалар

Маҳкумлар чекланмаган миқдорда пул жўнатмаларини олиши мумкин. Яқин қариндошларга пул юборишга рухсат этилади. Бошқа шахслар ёки ташкилотларга пул юбориш учун муассаса маъмуриятининг рухсати талаб қилинади.

Маҳкумлар чекланмаган миқдорда хат ва телеграммалар олиши ҳамда юбориши мумкин. Ёзишмаларни жўнатиш харажатлари маҳкумнинг шахсий маблағлари ҳисобидан тўланади.

Тартиб Ўзбекистон Республикасининг Жиноят-ижроия кодекси ва жазони ижро этиш муассасаларининг ички тартиб қоидалари билан белгиланади.