Nogironligi bo‘lgan shaxslarning ijtimoiy himoyasi

Nogironligi bo‘lgan shaxslarga ijtimoiy yordam

Nogironligi bo‘lgan shaxslarga ijtimoiy yordamning quyidagi turlari ko‘rsatiladi:

pul to‘lovlari — pensiyalar, nafaqalar va bir yo‘la beriladigan to‘lovlar;
reabilitatsiya qilishning texnik vositalari, surdotexnika, tiflotexnika vositalari va boshqa vositalar, shu jumladan o‘rindiqli aravachalar, protez-ortopediya moslamalari, maxsus harfli matbaa nashrlari, ovoz kuchaytiruvchi apparatlar va signalizatorlar, subtitrli yoki surdotarjimali videomateriallar, shuningdek avtomobillar bilan ta’minlash;
tibbiy, ijtimoiy, kasbiy va jismoniy reabilitatsiya qilish bo‘yicha xizmatlar hamda maishiy xizmatlar;
transport xizmatlari;
dori vositalari bilan ta’minlash.

Nogironligi bo‘lgan shaxslarga ijtimoiy yordam davlat organlari va tashkilotlari tomonidan qonunchilikda belgilangan tartibda ko‘rsatiladi.

Nogironligi bo‘lgan, o‘ziga o‘zi xizmat ko‘rsatish qobiliyatini qisman yoki to‘liq yo‘qotgan va o‘zgalarning doimiy parvarishiga muhtoj bo‘lgan shaxslarga ularning uyida hamda vakolatli davlat organlarining ixtisoslashtirilgan statsionar muassasalarida qonunchilikda belgilangan tartibda xizmatlar ko‘rsatiladi.

Ushbu muassasalarda ijtimoiy xizmatlar ko‘rsatish bilan bir qatorda hayot faoliyati uchun tegishli shart-sharoitlar ta’minlanadi, tibbiy xizmatlar ko‘rsatiladi, shuningdek mehnat faoliyati va dam olish tashkil etiladi.

Ish beruvchining aybi bilan mehnatda mayib bo‘lgan yoki kasb kasalligiga chalingan nogironligi bo‘lgan shaxslar tibbiy ko‘rsatmalarga binoan ish beruvchining mablag‘lari hisobidan reabilitatsiya qilishning texnik va maxsus transport vositalari bilan ta’minlanadi. Bunda tashkilotning tashkiliy-huquqiy shakli ahamiyatga ega emas.

Mahalliy davlat hokimiyati organlari nogironligi bo‘lgan shaxslarga mahalliy byudjet mablag‘lari hisobidan qo‘shimcha ijtimoiy kafolatlar belgilash huquqiga ega.

Nogironligi bo‘lgan shaxslar:

sanatoriy-kurortda bepul sog‘lomlashtirilish;
dori vositalari;
nogironligi bo‘lgan shaxslarni parvarish qilish uchun mo‘ljallangan tibbiy buyumlar;
nogironligi bo‘lgan bolalar uchun maxsus shifobaxsh oziq-ovqat mahsulotlari bilan ta’minlanish huquqiga ega.

Nogironligi bo‘lgan shaxslarni sanatoriy-kurortda sog‘lomlashtirish tartibi, shuningdek ular ta’minlanadigan dori vositalari, tibbiy buyumlar va maxsus shifobaxsh oziq-ovqat mahsulotlarining ro‘yxati Vazirlar Mahkamasi tomonidan belgilanadi.

Normativ hujjatlar

Asos: “Nogironligi bo‘lgan shaxslarning huquqlari to‘g‘risida”gi Qonunning 36-moddasi.

Maqola foydali bo‘ldimi?

Bo‘limlar