Ногиронлиги бўлган шахсларнинг ижтимоий ҳимояси

Ногиронлиги бўлган шахсларга ижтимоий ёрдам

Ногиронлиги бўлган шахсларга ижтимоий ёрдамнинг қуйидаги турлари кўрсатилади:

пул тўловлари — пенсиялар, нафақалар ва бир йўла бериладиган тўловлар;
реабилитация қилишнинг техник воситалари, сурдотехника, тифлотехника воситалари ва бошқа воситалар, шу жумладан ўриндиқли аравачалар, протез-ортопедия мосламалари, махсус ҳарфли матбаа нашрлари, овоз кучайтирувчи аппаратлар ва сигнализаторлар, субтитрли ёки сурдотаржимали видеоматериаллар, шунингдек автомобиллар билан таъминлаш;
тиббий, ижтимоий, касбий ва жисмоний реабилитация қилиш бўйича хизматлар ҳамда маиший хизматлар;
транспорт хизматлари;
дори воситалари билан таъминлаш.

Ногиронлиги бўлган шахсларга ижтимоий ёрдам давлат органлари ва ташкилотлари томонидан қонунчиликда белгиланган тартибда кўрсатилади.

Ногиронлиги бўлган, ўзига ўзи хизмат кўрсатиш қобилиятини қисман ёки тўлиқ йўқотган ва ўзгаларнинг доимий парваришига муҳтож бўлган шахсларга уларнинг уйида ҳамда ваколатли давлат органларининг ихтисослаштирилган стационар муассасаларида қонунчиликда белгиланган тартибда хизматлар кўрсатилади.

Ушбу муассасаларда ижтимоий хизматлар кўрсатиш билан бир қаторда ҳаёт фаолияти учун тегишли шарт-шароитлар таъминланади, тиббий хизматлар кўрсатилади, шунингдек меҳнат фаолияти ва дам олиш ташкил этилади.

Иш берувчининг айби билан меҳнатда майиб бўлган ёки касб касаллигига чалинган ногиронлиги бўлган шахслар тиббий кўрсатмаларга биноан иш берувчининг маблағлари ҳисобидан реабилитация қилишнинг техник ва махсус транспорт воситалари билан таъминланади. Бунда ташкилотнинг ташкилий-ҳуқуқий шакли аҳамиятга эга эмас.

Маҳаллий давлат ҳокимияти органлари ногиронлиги бўлган шахсларга маҳаллий бюджет маблағлари ҳисобидан қўшимча ижтимоий кафолатлар белгилаш ҳуқуқига эга.

Ногиронлиги бўлган шахслар:

санаторий-курортда бепул соғломлаштирилиш;
дори воситалари;
ногиронлиги бўлган шахсларни парвариш қилиш учун мўлжалланган тиббий буюмлар;
ногиронлиги бўлган болалар учун махсус шифобахш озиқ-овқат маҳсулотлари билан таъминланиш ҳуқуқига эга.

Ногиронлиги бўлган шахсларни санаторий-курортда соғломлаштириш тартиби, шунингдек улар таъминланадиган дори воситалари, тиббий буюмлар ва махсус шифобахш озиқ-овқат маҳсулотларининг рўйхати Вазирлар Маҳкамаси томонидан белгиланади.

Норматив ҳужжатлар

Асос: “Ногиронлиги бўлган шахсларнинг ҳуқуқлари тўғрисида”ги Қонуннинг 36-моддаси.