Nogironligi bo‘lgan shaxslar avtotransport vositalari uchun to‘xtab turish joylari

Bozorlar, savdo majmualari va boshqa ob’ektlar hududidagi avtotransport vositalari to‘xtab turish joylarining kirish va chiqish uchun qulay qismida nogironligi bo‘lgan shaxslarning avtotransport vositalari uchun maxsus joylar tashkil etiladi.

Bunday maxsus joylar avtotransport vositalari to‘xtab turish joyi umumiy maydonining kamida 5 foizini, biroq kamida 2 ta joyni tashkil etishi kerak.

Maxsus joylar qanday belgilanadi?

Nogironligi bo‘lgan shaxslarning avtotransport vositalari uchun ajratilgan joylarga:

5.15. «To‘xtab turish joyi» yo‘l belgisi;
7.17. «Nogironlar» qo‘shimcha axborot yo‘l belgisi;
1.24. «Nogironligi bo‘lgan shaxslarning avtotransport vositalari uchun to‘xtab turish joyi» yotiq yo‘l chizig‘i

o‘rnatiladi yoki chiziladi.

7.17. «Nogironlar» belgisi 5.15. «To‘xtab turish joyi» belgisi bilan birga qo‘llanadi va to‘xtab turish joyi yoki uning bir qismi «Nogiron» taniqlik belgisi o‘rnatilgan transport vositalari uchun ajratilganini bildiradi.

Maxsus to‘xtab turish joyidan kimlar foydalanishi mumkin?

Maxsus ajratilgan to‘xtab turish joylaridan «Nogiron» taniqlik belgisi o‘rnatilgan transport vositalari foydalanishi mumkin.

«Nogiron» taniqlik belgisi transport vositasining old va orqa tomoniga quyidagi hollarda o‘rnatiladi:

transport vositasini I yoki II guruh nogironligi bo‘lgan shaxs boshqarayotgan bo‘lsa;
transport vositasida nogironligi bo‘lgan shaxs tashilayotgan bo‘lsa;
transport vositasida nogironligi bo‘lgan bola tashilayotgan bo‘lsa.

Mazkur belgi sariq rangli kvadrat shaklida bo‘lib, uning ichiga 7.17. «Nogironlar» yo‘l belgisining qora rangli tasviri tushiriladi.

To‘xtab turish uchun haq olinadimi?

Nogironligi bo‘lgan shaxslarning avtotransport vositalari uchun maxsus ajratilgan to‘xtab turish joylaridan foydalanganlik uchun haq undirilmaydi.

Ko‘p qavatli avtoturargohlardagi talablar

Ko‘p qavatli avtotransport vositalari to‘xtab turish joylarida nogironligi bo‘lgan shaxslarning avtotransport vositalari uchun:

birinchi qavatdan;
boshqa qavatlarda esa liftga yaqin joylardan

maxsus o‘rinlar ajratilishi kerak.

Maxsus joylarning o‘lchamlari

Avtotransport vositasi harakat yo‘nalishiga burchak ostida qo‘yilganda maxsus joyning:

eni — 3,5 metr;
uzunligi — 5 metr

bo‘lishi kerak.

Avtotransport vositasi harakat yo‘nalishiga parallel qo‘yilganda maxsus joyning:

eni — 2,5 metr;
uzunligi — 7,5 metr

bo‘lishi lozim.

Maxsus joylarni jihozlash uchun kim javobgar?

Nogironligi bo‘lgan shaxslarning avtotransport vositalari uchun mo‘ljallangan joylarni jihozlash, yo‘l belgilarini o‘rnatish hamda yotiq yo‘l chiziqlarini soz va ko‘rinadigan holatda saqlash:

avtoturargoh egasi;
yoki tegishli avtomobilь yo‘liga egalik qiluvchi sub’ekt

tomonidan ta’minlanadi.

To‘xtab turish joylaridan uzoq yoki noqulay joylashgan sog‘liqni saqlash muassasalari, sport-sog‘lomlashtirish majmualari va boshqa ijtimoiy infratuzilma ob’ektlari atrofida ham nogironligi bo‘lgan shaxslar uchun maxsus to‘xtab turish joylari tashkil etilishi kerak.

Normativ hujjatlar

Nogironligi bo‘lgan shaxslar avtotransport vositalarining to‘xtab turish joylariga qo‘yiladigan talablar to‘g‘risidagi nizom, ro‘yxat raqami 3048

O‘zbekiston Respublikasi Vazirlar Mahkamasining 2022-yil 12 apreldagi 172-son qarori bilan tasdiqlangan Yo‘l harakati qoidalari