Gaz va elektr energiyasi uchun kompensatsiya olish tartibi

Gaz va elektr energiyasi tariflarini oshirishda gaz importi hisobga olingan — energetika vaziri

Kim ariza berishi mumkin

Kompensatsiya olish uchun 18 yoshga to‘lgan O‘zbekiston fuqarosi, O‘zbekistonda yashash guvohnomasiga ega chet el fuqarosi yoki fuqaroligi bo‘lmagan shaxs murojaat qilishi mumkin.

Kompensatsiya oilaga tayinlanadi. Shu sababli bir oila bo‘yicha kompensatsiya avval tayinlangan bo‘lsa, boshqa oila a’zosining takroriy arizasi rad etiladi.

Qaerga va qachon murojaat qilinadi

Ariza har oyning 16-sanasiga qadar quyidagi usullardan biri orqali beriladi:

Davlat xizmatlari markaziga bevosita borish;
«Inson» ijtimoiy xizmatlar markaziga murojaat qilish;
oila yashaydigan mahallaga biriktirilgan ijtimoiy xodim orqali;
«Yagona milliy ijtimoiy himoya» axborot tizimi orqali;
Yagona interaktiv davlat xizmatlari portali — my.gov.uz orqali.

Davlat xizmati uchun yig‘im undirilmaydi.

Ariza qanday tekshiriladi

So‘rovnomada oila tarkibi, yashash manzili hamda elektr energiyasi va tabiiy gaz bo‘yicha shaxsiy hisobvaraq ma’lumotlari ko‘rsatiladi.

Vakolatli organ axborot tizimlari orqali:

oilaning Ijtimoiy reestrga kiritilganini;
oila a’zolarining daromadlarini;
ko‘chmas mulk va er uchastkalarini;
transport vositalarini;
gaz va elektr energiyasi iste’molini tekshiradi.

Oila Reestrga kiritilmagan bo‘lsa, uning moddiy holati «davlat ta’minotidagi oila» yoki «kambag‘al oila» toifasi mezonlari bo‘yicha baholanadi.

Rad etish asoslari

Kompensatsiya tayinlash:

jon boshiga daromad minimal iste’mol xarajatlarining 1,5 baravaridan yuqori bo‘lsa;
oilada belgilangan mezondan ortiq ko‘chmas mulk yoki noturar joy mavjud bo‘lsa;
oila a’zolarida reglamentda nazarda tutilgan yangi yoki bir nechta transport vositalari mavjud bo‘lsa;
oilaga kompensatsiya avval tayinlangan bo‘lsa rad etiladi.

Jumladan, ishlab chiqarilganiga 12 yildan oshmagan soz engil avtomobilь mavjudligi rad etishga asos bo‘lishi mumkin. Oilada I yoki II guruh nogironligi bo‘lgan shaxs yoxud 18 yoshgacha bolalikdan nogironligi bo‘lgan bola mavjud bo‘lsa, engil avtomobilь uchun 7 yillik mezon qo‘llanadi.

Muhim: daromadning o‘zi mezonga mos bo‘lishi etarli emas. Oilaning ko‘chmas mulki va transport vositalari ham baholanadi.

Kompensatsiyani to‘lash

Kompensatsiya miqdori ariza berilgan uy-joy bo‘yicha ariza topshirilishidan oldingi oydagi amaldagi gaz va elektr iste’moli asosida avtomatik hisoblanadi.

To‘lov ariza berilgan oydan keyingi oyning 27-sanasiga qadar Xalq banki orqali:

ijtimoiy kartaga;
bank kartasiga o‘tkaziladi.

Ariza beruvchining kartasi bo‘lmasa, to‘lov Xalq bankida uning oila a’zosi nomiga ochilgan kartaga o‘tkazilishi mumkin.

Keyingi oylarda rad etish asosi aniqlanmasa, kompensatsiya yangi arizasiz davom ettiriladi.

Ushbu davlat xizmati Vazirlar Mahkamasining 2024-yil 16-apreldagi 204-son qarori bilan tasdiqlangan ma’muriy reglament asosida ko‘rsatiladi.

Maqola foydali bo‘ldimi?

Bo‘limlar