Газ ва электр энергияси учун компенсация олиш тартиби

Gaz va elektr energiyasi tariflarini oshirishda gaz importi hisobga olingan — energetika vaziri

Ким ариза бериши мумкин

Компенсация олиш учун 18 ёшга тўлган Ўзбекистон фуқароси, Ўзбекистонда яшаш гувоҳномасига эга чет эл фуқароси ёки фуқаролиги бўлмаган шахс мурожаат қилиши мумкин.

Компенсация оилага тайинланади. Шу сабабли бир оила бўйича компенсация аввал тайинланган бўлса, бошқа оила аъзосининг такрорий аризаси рад этилади.

Қаерга ва қачон мурожаат қилинади

Ариза ҳар ойнинг 16-санасига қадар қуйидаги усуллардан бири орқали берилади:

Давлат хизматлари марказига бевосита бориш;
«Инсон» ижтимоий хизматлар марказига мурожаат қилиш;
оила яшайдиган маҳаллага бириктирилган ижтимоий ходим орқали;
«Ягона миллий ижтимоий ҳимоя» ахборот тизими орқали;
Ягона интерактив давлат хизматлари портали — my.gov.uz орқали.

Давлат хизмати учун йиғим ундирилмайди.

Ариза қандай текширилади

Сўровномада оила таркиби, яшаш манзили ҳамда электр энергияси ва табиий газ бўйича шахсий ҳисобварақ маълумотлари кўрсатилади.

Ваколатли орган ахборот тизимлари орқали:

оиланинг Ижтимоий реестрга киритилганини;
оила аъзоларининг даромадларини;
кўчмас мулк ва ер участкаларини;
транспорт воситаларини;
газ ва электр энергияси истеъмолини текширади.

Оила Реестрга киритилмаган бўлса, унинг моддий ҳолати «давлат таъминотидаги оила» ёки «камбағал оила» тоифаси мезонлари бўйича баҳоланади.

Рад этиш асослари

Компенсация тайинлаш:

жон бошига даромад минимал истеъмол харажатларининг 1,5 бараваридан юқори бўлса;
оилада белгиланган мезондан ортиқ кўчмас мулк ёки нотурар жой мавжуд бўлса;
оила аъзоларида регламентда назарда тутилган янги ёки бир нечта транспорт воситалари мавжуд бўлса;
оилага компенсация аввал тайинланган бўлса рад этилади.

Жумладан, ишлаб чиқарилганига 12 йилдан ошмаган соз енгил автомобиль мавжудлиги рад этишга асос бўлиши мумкин. Оилада I ёки II гуруҳ ногиронлиги бўлган шахс ёхуд 18 ёшгача болаликдан ногиронлиги бўлган бола мавжуд бўлса, енгил автомобиль учун 7 йиллик мезон қўлланади.

Муҳим: даромаднинг ўзи мезонга мос бўлиши етарли эмас. Оиланинг кўчмас мулки ва транспорт воситалари ҳам баҳоланади.

Компенсацияни тўлаш

Компенсация миқдори ариза берилган уй-жой бўйича ариза топширилишидан олдинги ойдаги амалдаги газ ва электр истеъмоли асосида автоматик ҳисобланади.

Тўлов ариза берилган ойдан кейинги ойнинг 27-санасига қадар Халқ банки орқали:

ижтимоий картага;
банк картасига ўтказилади.

Ариза берувчининг картаси бўлмаса, тўлов Халқ банкида унинг оила аъзоси номига очилган картага ўтказилиши мумкин.

Кейинги ойларда рад этиш асоси аниқланмаса, компенсация янги аризасиз давом эттирилади.

Ушбу давлат хизмати Вазирлар Маҳкамасининг 2024 йил 16 апрелдаги 204-сон қарори билан тасдиқланган маъмурий регламент асосида кўрсатилади.