Temir yo‘l transportida chegirma va imtiyozlar

Temir yo‘llarda yiliga bir marta bepul yurish huquqiga ega shaxslar | Mintransuz

5 yoshgacha bo‘lgan bolalar

Yo‘lovchi o‘zi bilan 5 yoshgacha bo‘lgan bitta bolani alohida joy ajratilmasdan bepul olib yurishi mumkin.

Bolaga bepul chipta ota yoki onaning chiptasi asosida rasmiylashtiriladi.

Agar ikkala ota-ona birga ketayotgan bo‘lsa, har bir ota-onaning chiptasiga 5 yoshgacha bo‘lgan bittadan bola uchun bepul chipta rasmiylashtirilishi mumkin.

Bola uchun alohida joy talab qilinsa, unga tegishli bolalar chiptasi sotib olinadi.

Bir katta yo‘lovchi bilan 5 yoshgacha bo‘lgan bir nechta bola ketayotgan bo‘lsa:

bittasi bepul va alohida joysiz;
qolganlari 50 foiz chegirma va alohida joy bilan tashiladi.

5 yoshdan 10 yoshgacha bo‘lgan bolalar

5 yoshdan 10 yoshgacha bo‘lgan bolaga:

tarif qiymatidan 50 foiz chegirma;
alohida joy beriladi.

Bolaning yoshi poezd jo‘naydigan vaqtdagi yoshi bo‘yicha aniqlanadi. 10 yoshdan oshgan bola uchun kattalar chiptasi olinadi.

16 yoshgacha bo‘lgan bolaning ota-onasiz poezdda yurishiga, qoida tariqasida, yo‘l qo‘yilmaydi. Maktab, litsey yoki kollejga borish uchun temir yo‘ldan foydalanuvchi o‘quvchilar bundan mustasno.

Nazorat vaqtida bolaning yoshini tasdiqlovchi hujjat talab qilinishi mumkin.

Yiliga ikki marta bepul yurish

Vatan himoyasi va el-yurt tinchligi yo‘lida halok bo‘lgan harbiy xizmatchi yoki xodimning ota-onasiga O‘zbekiston hududi bo‘ylab temir yo‘l transportidan yiliga ikki marta bepul foydalanish huquqi berilgan.

Yiliga bir marta bepul yurish

Borish va kelish uchun yiliga bir marta bepul yurish huquqi quyidagilarga beriladi:

Sovet Ittifoqi Qahramonlari va Shon-shuhrat ordenining uchala darajasi bilan taqdirlangan shaxslar;
1941–1945-yillardagi urushda I yoki II guruh nogironligi bo‘lgan shaxslar va ularga tenglashtirilgan shaxslar;
Chernobilь AES halokati oqibatida nurlanish kasalligiga chalingan yoki uni boshidan kechirgan shaxslar, shuningdek, Chernobilь halokati sababli nogironligi bo‘lgan shaxslar;
o‘zgalar parvarishiga muhtoj keksalar va nogironligi bo‘lgan shaxslar hamda ularni kuzatuvchi shaxs;
1941–1945-yillardagi urushda III guruh nogironligi bo‘lgan shaxslar va ularga tenglashtirilgan shaxslar;
1941–1945-yillardagi urush qatnashchilari.

Yiliga bir marta bepul yurish huquqi bir marta borish va bir marta qaytishni qamrab oladi.

50 foiz chegirma

Borish va kelish uchun yiliga bir marta chipta qiymatining 50 foizi miqdoridagi chegirma quyidagilarga beriladi:

1941–1945-yillardagi urush qatnashchilariga tenglashtirilgan shaxslar;
urushda I guruh nogironligi bo‘lgan yoki ularga tenglashtirilgan shaxslarni kuzatuvchi shaxslar;
sobiq SSSRni himoya qilish yoki harbiy xizmat vazifasini bajarish vaqtida halok bo‘lgan harbiy xizmatchilarning ota-onalari va turmush o‘rtoqlari.

50 foizlik yillik imtiyozdan foydalanmagan shaxsga belgilangan shartlar asosida ikki yillik foydalanilmagan chegirma o‘rniga bir marta bepul borish va kelish huquqi rasmiylashtirilishi mumkin.

Imtiyozni rasmiylashtirish

Bepul yoki imtiyozli chipta olish huquqi haqidagi ma’lumotlar vakolatli temir yo‘l bo‘linmasi tomonidan idoralararo elektron hamkorlik orqali tekshiriladi.

Axborot tizimida ma’lumot topilmasa, imtiyoz huquqini tasdiqlovchi hujjatni taqdim etish talab qilinishi mumkin.

Temir yo‘ldagi bolalar chegirmalari va boshqa imtiyozlar Vazirlar Mahkamasining 2012-yil 13-apreldagi 109-son qarori bilan belgilangan.

Maqola foydali bo‘ldimi?

Bo‘limlar