Темир йўл транспортида чегирма ва имтиёзлар

Темир йўлларда йилига бир марта бепул юриш ҳуқуқига эга шахслар | Mintransuz

5 ёшгача бўлган болалар

Йўловчи ўзи билан 5 ёшгача бўлган битта болани алоҳида жой ажратилмасдан бепул олиб юриши мумкин.

Болага бепул чипта ота ёки онанинг чиптаси асосида расмийлаштирилади.

Агар иккала ота-она бирга кетаётган бўлса, ҳар бир ота-онанинг чиптасига 5 ёшгача бўлган биттадан бола учун бепул чипта расмийлаштирилиши мумкин.

Бола учун алоҳида жой талаб қилинса, унга тегишли болалар чиптаси сотиб олинади.

Бир катта йўловчи билан 5 ёшгача бўлган бир нечта бола кетаётган бўлса:

биттаси бепул ва алоҳида жойсиз;
қолганлари 50 фоиз чегирма ва алоҳида жой билан ташилади.

5 ёшдан 10 ёшгача бўлган болалар

5 ёшдан 10 ёшгача бўлган болага:

тариф қийматидан 50 фоиз чегирма;
алоҳида жой берилади.

Боланинг ёши поезд жўнайдиган вақтдаги ёши бўйича аниқланади. 10 ёшдан ошган бола учун катталар чиптаси олинади.

16 ёшгача бўлган боланинг ота-онасиз поездда юришига, қоида тариқасида, йўл қўйилмайди. Мактаб, лицей ёки коллежга бориш учун темир йўлдан фойдаланувчи ўқувчилар бундан мустасно.

Назорат вақтида боланинг ёшини тасдиқловчи ҳужжат талаб қилиниши мумкин.

Йилига икки марта бепул юриш

Ватан ҳимояси ва эл-юрт тинчлиги йўлида ҳалок бўлган ҳарбий хизматчи ёки ходимнинг ота-онасига Ўзбекистон ҳудуди бўйлаб темир йўл транспортидан йилига икки марта бепул фойдаланиш ҳуқуқи берилган.

Йилига бир марта бепул юриш

Бориш ва келиш учун йилига бир марта бепул юриш ҳуқуқи қуйидагиларга берилади:

Совет Иттифоқи Қаҳрамонлари ва Шон-шуҳрат орденининг учала даражаси билан тақдирланган шахслар;
1941–1945 йиллардаги урушда I ёки II гуруҳ ногиронлиги бўлган шахслар ва уларга тенглаштирилган шахслар;
Чернобиль АЭС ҳалокати оқибатида нурланиш касаллигига чалинган ёки уни бошидан кечирган шахслар, шунингдек, Чернобиль ҳалокати сабабли ногиронлиги бўлган шахслар;
ўзгалар парваришига муҳтож кексалар ва ногиронлиги бўлган шахслар ҳамда уларни кузатувчи шахс;
1941–1945 йиллардаги урушда III гуруҳ ногиронлиги бўлган шахслар ва уларга тенглаштирилган шахслар;
1941–1945 йиллардаги уруш қатнашчилари.

Йилига бир марта бепул юриш ҳуқуқи бир марта бориш ва бир марта қайтишни қамраб олади.

50 фоиз чегирма

Бориш ва келиш учун йилига бир марта чипта қийматининг 50 фоизи миқдоридаги чегирма қуйидагиларга берилади:

1941–1945 йиллардаги уруш қатнашчиларига тенглаштирилган шахслар;
урушда I гуруҳ ногиронлиги бўлган ёки уларга тенглаштирилган шахсларни кузатувчи шахслар;
собиқ СССРни ҳимоя қилиш ёки ҳарбий хизмат вазифасини бажариш вақтида ҳалок бўлган ҳарбий хизматчиларнинг ота-оналари ва турмуш ўртоқлари.

50 фоизлик йиллик имтиёздан фойдаланмаган шахсга белгиланган шартлар асосида икки йиллик фойдаланилмаган чегирма ўрнига бир марта бепул бориш ва келиш ҳуқуқи расмийлаштирилиши мумкин.

Имтиёзни расмийлаштириш

Бепул ёки имтиёзли чипта олиш ҳуқуқи ҳақидаги маълумотлар ваколатли темир йўл бўлинмаси томонидан идоралараро электрон ҳамкорлик орқали текширилади.

Ахборот тизимида маълумот топилмаса, имтиёз ҳуқуқини тасдиқловчи ҳужжатни тақдим этиш талаб қилиниши мумкин.

Темир йўлдаги болалар чегирмалари ва бошқа имтиёзлар Вазирлар Маҳкамасининг 2012 йил 13 апрелдаги 109-сон қарори билан белгиланган.