Poezd yoki vokzalda unutib qoldirilgan buyumlarni qaytarib olish

Poezdda buyum unutib qoldirilganda

Yo‘lovchi poezddan tushganidan keyin vagonda buyum qoldirganini aniqlasa, darhol vokzal boshlig‘iga murojaat qilishi kerak.

Yozma arizada:

poezd raqami va yo‘nalishi;
vagon va joy raqami;
buyum unutilgan taxminiy vaqt;
buyumning tashqi ko‘rinishi;
uning ichidagi narsalar;
buyumni etkazish so‘ralayotgan manzil;
murojaat qiluvchining aloqa ma’lumotlari ko‘rsatiladi.

Vokzal boshlig‘i xabarni poezd yo‘nalishidagi birinchi yirik stantsiya yoki poezdning oxirgi manzil stantsiyasi boshlig‘iga zudlik bilan yuboradi.

Qanchalik erta murojaat qilinsa, buyumni poezd hali yo‘lda bo‘lgan vaqtda topish imkoniyati shunchalik yuqori bo‘ladi.

Topilgan buyumni rasmiylashtirish

Poezdda unutilgan yoki yo‘qotilgan buyum topilsa, uning:

tashqi ko‘rinishi;
topilgan joyi;
topilgan vaqti;
topilish holatlari ko‘rsatilgan dalolatnoma tuziladi.

Dalolatnoma poezd brigadiri, vagon kuzatuvchisi, buyumni topgan shaxs va transport ichki ishlar organi xodimi ishtirokida rasmiylashtiriladi.

Buyum transport ichki ishlar organi xodimi ishtirokida ochiladi. Ochish natijasi bo‘yicha alohida dalolatnoma va buyumlar ro‘yxati ikki nusxada tuziladi.

Topilgan buyum dalolatnoma bilan birga poezdning oxirgi manzil vokzali boshlig‘iga tilxat asosida topshiriladi.

Vokzalda buyum unutib qoldirilganda

Vokzalda unutilgan buyum bo‘yicha ham vokzal boshlig‘i yoki navbatchi ma’murga murojaat qilinadi.

Arizada buyumning aniq belgilari, uning tarkibi, unutilgan joy va vaqt ko‘rsatilishi kerak.

Agar buyum egasini aniqlash imkonini beruvchi ma’lumotlar mavjud bo‘lsa, unga buyum turgan joy haqida zudlik bilan xabar beriladi.

Saqlash muddati

Topilgan buyum vokzalda 30 kun saqlanadi.

Mazkur muddatda talab qilib olinmagan buyum dalolatnoma va ro‘yxat bilan hujjatsiz yuklar omboriga yuboriladi.

Shuning uchun 30 kun o‘tgan bo‘lsa ham, buyum butunlay yo‘q qilingan deb hisoblamasdan, vokzal ma’muriyatidan uning qaerga yuborilganini aniqlash lozim.

Buyumga egalikni tasdiqlash

Buyumni olish uchun shaxs:

uning aniq tashqi belgilarini;
ichidagi narsalarni;
o‘ziga xos xususiyatlarini yozma ravishda ko‘rsatishi;
qulflangan buyum bo‘lsa, uning kalitini taqdim etishi mumkin.

Shaxsni tasdiqlovchi hujjat tekshirilgandan keyin buyum vokzal boshlig‘ining farmoyishi asosida egasiga beriladi.

Buyumni qabul qilgan shaxs shaxsini tasdiqlovchi hujjat ma’lumotlari ko‘rsatilgan tilxat beradi.

Qaytarish xarajatlari

Buyum egasi:

saqlash;
xabar yuborish;
qadoqlash;
bagaj tarifi bo‘yicha tashish;
zarur bo‘lganda e’lon berish xarajatlarini to‘laydi.

Buyumni egasi turgan manzilga etkazish va qaytarish bilan bog‘liq xarajatlar buyum egasi hisobidan amalga oshiriladi.

Topilgan buyumlarni rasmiylashtirish, saqlash va egasiga qaytarish tartibi Vazirlar Mahkamasining 2012-yil 13-apreldagi 109-son qarori bilan belgilangan.