Prezidentimizning “Davlat fuqarolik xizmatini yangi yondashuvlar asosida tashkil etish hamda professional va natijadorlikka yo‘naltirilgan davlat xizmatchilari korpusini shakllantirish chora-tadbirlari to‘g‘risida”gi PF-95-sonli farmoni qabul qilindi. Unga ko‘ra:

2026 yil 1 yanvardan:

• birinchi marta ishga qabul qilingan davlat xizmatchilari bilan mehnat shartnomasi dastlab bir yil muddatga tuziladi, keyinchalik - faoliyatning ijobiy natijalariga qarab nomuayyan muddatga uzaytiriladi;

• davlat xizmatiga birinchi marta qabul qilingan xizmatchilar “Davlat xizmatiga kirish” majburiy maxsus kurslarini, keyinchalik esa kamida 3 yilda bir marta malaka oshirish kurslarini o‘taydi, kurslar yakunlari bo‘yicha ularning nazariy bilim va ko‘nikmalari baholanadi.

Respublika ijro etuvchi hokimiyat organlarining rahbarlik lavozimlariga kamida 500 nafar nomzoddan va mahalliy ijro etuvchi hokimiyat organlarining rahbarlik lavozimlariga kamida 1 000 nafar nomzoddan iborat Milliy kadrlar zaxirasi shakllantiriladi.

Shuningdek, mahallada faoliyat yuritayotgan va oxirgi ikki yil davomida ijobiy natija ko‘rsatgan 1 000 nafar mahalla raisi, hokim yordamchisi, xotin-qizlar faoli, yoshlar yetakchisi, ijtimoiy xodim va soliq inspektorlaridan iborat salohiyatli kadrlar zaxirasi shakllantirilib, ular Davlat xizmatini rivojlantirish agentligi tavsiyasiga asosan tanlovdan tashqari lavozimga tayinlanadi.

2025 yil 1 oktyabrdan boshlab davlat xizmatchilarining xorijiy va ichki xizmat safarlarini tashkil etish, hisobini yuritish va tahlil qilish “hrm.argos.uz” elektron tizimi tarkibidagi “Xizmat safari” yagona modulida amalga oshiriladi. Bunda: 

• xizmat safarlari rejalari va natijalari, geografiyasi, xodimlar soni, shuningdek, xarajatlarni onlayn kuzatish imkoniyati yaratiladi;

• xizmat safarlarining muayyan davlat organi faoliyati samaradorligiga bevosita, oraliq va yakuniy taʼsiri monitoringi olib boriladi;

• davlat xizmatchilari har bir xorijiy xizmat komandirlarining yakunlari to‘g‘risida hisobot taqdim etadilar.

Inson resurslarini rivojlantirish va boshqarish bo‘linmalari rahbarlari:

• rahbarning kadrlar siyosati bo‘yicha maslahatchisi maqomiga ega bo‘lishadi;

• Davlat xizmatini rivojlantirish agentligi yoki uning filiallari bilan kelishilgan holda lavozimga tayinlanadi va lavozimdan ozod etiladi;

• har uch yilda Davlat xizmatini rivojlantirish agentligida attestatsiyadan o‘tadi;

2025 yil 1 avgustdan davlat organlari va tashkilotlarida har ish kunining belgilangan vaqtida jismoniy tarbiya tadbirlari o‘tkaziladi. Shuningdek, ishchilarning tana vazni indeksi aniqlanib, bu haqdagi maʼlumotlar “hrm.argos.uz” platformasida doimiy eʼlon qilib boriladi.

Shuningdek, 2026 yil 1 yanvardan boshlab davlat xizmatchilari bir yilda bir marta tibbiy ko‘rikdan o‘tkaziladi. Bundan tashqari, davlat idoralari oshxonalari to‘liq autsorsingga beriladi. Sog‘lom ovqatlanishni joriy etish va inson salomatligiga salbiy taʼsir ko‘rsatadigan shirinliklar, yog‘li, unli oziq-ovqat mahsulotlari va taomlar, shuningdek, boshqa turdagi mahsulotlar savdosini cheklash talablardan biri bo‘ladi. 

2025 yil 1 sentyabrdan boshlab davlat xizmatchilarining o‘z ko‘nikmalarini doimiy rivojlantirib borishi hamda ular o‘rtasida o‘zaro muloqotni kuchaytirish bo‘yicha quyidagi imkoniyatlarni nazarda tutuvchi “Davlat xizmatchisi” mobil ilovasi ishga tushiriladi.

Hujjat bilan quyidagilar tasdiqlangan:

• Davlat fuqarolik xizmatini 2030 yilgacha rivojlantirish strategiyasi;

• Davlat fuqarolik xizmati joriy etiladigan davlat organlari va tashkilotlari ro‘yxati;

• Davlat fuqarolik xizmatchilariga malaka darajalari berish tartibi to‘g‘risidagi nizom va boshqalar.