O‘zbekistonda akademik litseylar kirish test sinovlari 24-25 iyul kunlari o‘tkaziladi. Bu haqda Oliy taʼlim, fan va innovatsiyalar vazirligi xabar berdi.

Maʼlum qilinishicha, kirish test sinovlari 2025 yil 24 iyul kuni respublikamizning barcha hududida, 25 iyul kuni Toshkent shahrida Bilim va malakalarni baholash agentligi tomonidan maxsus belgilangan hududlarda ikki smenada o‘tkaziladi.

Test sinovlari kuniga 2 smenada tashkil etiladi.

• 1-smena soat 09:00 da,

• 2-smena soat 15:00 da boshlanadi.

 Abituriyentlardan test sinovlari boshlanishidan kamida bir yarim soat oldin belgilangan hududga yetib shaxsini tasdiqlovchi hujjat va test sinovida ishtirok etish uchun ruxsatnoma bilan kelishlari talab etiladi.

Test sinovlari taʼlim yo‘nalishiga mos 2 ta fan va intellektual qobiliyat darajasi (IQ)ni aniqlash bo‘yicha o‘tkaziladi.

Bunda talabgorlarga har bir fandan 20 tadan jami 60 ta test topshirig‘i va ularni bajarish uchun javoblar varaqasini to‘ldirish bilan birga 1 soat-u 50 daqiqa vaqt ajratiladi.

Test sinovlarida to‘plash mumkin bo‘lgan maksimal ball – 146 ball bo‘lib, taʼlim yo‘nalishiga mos fanlar bo‘yicha har bir to‘g‘ri javob uchun 3,1 balldan (jami 124 ball), intellektual qobiliyat darajasi (IQ) ni aniqlash bo‘yicha esa 1,1 balldan (jami 22 ball) beriladi.

Talabgorlar test sinovida ishtirok etish uchun ruxsatnomani my.edu.uz platformasida shaxsiy kabinetga login va parol bilan kirgan holda va akademik litseylardan olishlari mumkin bo‘ladi.