“To‘qimachilik va tikuv-trikotaj sanoatida islohotlarni jadallashtirish va eksport salohiyatini kengaytirish chora-tadbirlari to‘g‘risida”gi Prezident qarori (PQ–290-son, 19.09.2025 y.) qabul qilindi. 

Qarorga ko‘ra, to‘qimachilik va tikuv-trikotaj sanoatida 2026 yil uchun asosiy maqsadli ko‘rsatkichlar etib quyidagilar belgilandi, jumladan:

⇒ ishlab chiqarish hajmi 9 foizga o‘sishini taʼminlash va 146 trln so‘mga yetkazish;

⇒ eksportni 3,3 mlrd AQSH dollariga yetkazish.

Qarorga ko‘ra, Qishloq xo‘jaligini davlat tomonidan qo‘llab-quvvatlash jamg‘armasi hisobidan tijorat banklari orqali 2022–2023 yillar paxta hosiliga ajratilgan kreditlardan qarzdorligi mavjud bo‘lgan paxta-to‘qimachilik klasterlari bo‘yicha garov taʼminotini mol-mulk bilan to‘liq taʼminlagan klasterlarga:

⇒ 2025 yil 1 avgustdan faqat asosiy qarzni to‘lashga hamda asosiy qarz tugagandan keyingi 12 oyda teng ulushlarda foiz to‘lashga ruxsat etiladi;

⇒ to‘lov grafigi bo‘yicha ham asosiy qarz, ham foizini o‘z vaqtida to‘lagan klasterlarga ushbu kreditlar bo‘yicha Jamg‘armaga joriy yil 1 avgustdan keyin undirilgan foiz summasining 50 foizi qaytarib beriladi;

⇒ 2025 yil 1 avgust holatiga to‘lanmagan foizlarga hisoblangan penya summalari hisobdan chiqariladi.

Qarorga ko‘ra, 2025 yil paxta hosilini nobud qilmasdan, o‘z vaqtida terib olishni taʼminlash maqsadida fermer xo‘jaliklariga ular tomonidan qayta ishlovchi korxonalarga, shu jumladan, klasterlarga birja savdolari orqali sotilgan har bir tonna paxta xomashyosi uchun 1 mln so‘mdan subsidiya ajratiladi. 

Klasterlar va tarmoq korxonalari o‘z mablag‘i hisobidan paxta yetishtirsa yoki xarid qilsa, xomashyo qiymatining 10 foizi qoplab beriladi.

2025 yil 1 sentyabrdan 3 yil muddatga:

⇒ klasterlar, to‘qimachilik va tikuv-trikotaj sanoati korxonalariga ijtimoiy soliq stavkasi 1 foiz etib belgilanadi;

⇒ belgilangan tartibda shakllantiriladigan ro‘yxatlar bo‘yicha olib kiriladigan va O‘zbekistonda ishlab chiqarilmaydigan aralash mato va gazlama mahsulotlari, charm va ipak sanoati uchun zarur xomashyolar bojxona bojidan ozod etiladi.

Mehnat shartnomasi asosida ishlayotgan xodimlari soni 200 dan ortiq bo‘lgan paxta-to‘qimachilik va tikuv-trikotaj korxonalari tomonidan tashkil etilgan maktabgacha taʼlim tashkilotlariga oilaviy nodavlat maktabgacha taʼlim tashkilotlari uchun belgilangan shartlarda Davlat byudjetidan subsidiya ajratiladi.