O‘zbekiston OTMlarida 25-sentabrdan 3-oktabrga qadar (shu kuni ham) bakalavriat ta’lim yo‘nalishlari vakant o‘rinlariga qo‘shimcha qabul o‘tkaziladi. Unda 56,7 ball va undan yuqori natija ko‘rsatgan, biroq talabalikka tavsiya etilmagan abituriyentlar ishtirok etishi mumkin.

O‘zbekistondagi davlat oliy ta’lim muassasalarining bakalavriat ta’lim yo‘nalishlari vakant o‘rinlariga 2025/2026-o‘quv yili uchun qo‘shimcha qabul 25-sentabrdan 3-oktabrga qadar (shu kuni ham) amalga oshiriladi. Bu haqda Oliy ta’lim vazirligi xabar qildi.

Unga ko‘ra, 2025-yilgi kirish imtihonlarida 56,7 ball va undan yuqori natija ko‘rsatgan, biroq talabalikka tavsiya etilmagan, shu jumladan, ro‘yxatdan o‘tishning ikkinchi bosqichida oliy ta’lim tashkiloti va bakalavriat ta’lim yo‘nalishlarini tanlamagan abituriyentlarga quyidagi imkoniyatlar yaratiladi:

• davlat oliy ta’lim tashkilotlarida qolgan vakant bakalavriat ta’lim yo‘nalishlariga tanlovda ishtirok etish uchun 2025-yil 25-sentabrdan 3-oktabrga qadar (shu kuni ham) my.uzbmb.uz sayti orqali onlayn ro‘yxatdan o‘tish imkoniyati yaratiladi;
• ro‘yxatdan o‘tgan abituriyentlar to‘plagan ballari ketma-ketligiga qat’iy rioya qilingan holda vakant o‘rinlarga bazaviy to‘lov-kontrakt asosida talabalikka tavsiya etiladi;
• ro‘yxatdan o‘tish jarayonida fanlar majmuasi mos bo‘lgan bakalavriat yo‘nalishini tanlash imkoniyati beriladi;
• tanlov natijalari bo‘yicha qaydnomalar 2025-yil 8-oktabrga qadar chop etilib, tegishli oliy ta’lim tashkilotlariga talabalikka qabul qilish bo‘yicha hujjatlarni rasmiylashtirish uchun yetkaziladi.

Umumiy qabul parametrlarida vakant o‘rinlar qolgan bakalavriat ta’lim yo‘nalishlari bo‘yicha ma’lumotlar Bilim va malakalarni baholash agentligining rasmiy veb-saytida e’lon qilinadi.