O‘zbekistonda haydovchilik guvohnomasini my.gov.uz portali orqali onlayn tiklash mumkin bo‘ldi. Endi yo‘qotilgan guvohnomani tiklash uchun YPX binosiga borish shart emas. Xizmat narxi — 370 800 so‘m. Hujjat 1 ish kunida rasmiylashtiriladi.

O‘zbekistonda haydovchilik guvohnomalarini Yagona interaktiv davlat xizmatlari portali (YAIDXP, my.gov.uz) orqali tiklash mumkin bo‘ldi. Bu haqda portal axborot xizmati xabar qildi. Endilikda yo‘qotilgan haydovchilik guvohnomasini qayta tiklash uchun YPX binosiga borish talab etilmaydi.

Buning uchun my.gov.uz portali orqali “Haydovchilik guvohnomasini rasmiylashtirish” xizmatiga kirib, “Yo‘qolgan haydovchilik guvohnomasini tiklash” bo‘limini tanlab, ariza topshirish lozim.

Xizmat narxi bazaviy hisoblash miqdorining 0,9 baravari yoki 370 800 so‘mni tashkil etadi. Qo‘shimcha 25 000 so‘m to‘lov evaziga guvohnomani pochta orqali yetkazib berish xizmatidan foydalanish mumkin.

Xizmat ko‘rsatish muddati — 1 ish kuni. Pochta orqali yetkazib berish bilan birga jami 3 ish kuni ichida yangi guvohnoma fuqaroga yetkaziladi.

Ayrim hollarda ariza rad etilishi mumkin, jumladan:

• haydovchilik guvohnomasi haqidagi ma’lumotlar tizimda tasdiqlanmasa;
• arizachi transport vositasini boshqarish huquqidan mahrum etilgan bo‘lsa;
• arizachiga nisbatan Ma’muriy javobgarlik to‘g‘risidagi kodeksning 131- (Transport vositalarini mastlik holatida boshqarish) va 136-modda (Transport vositalari haydovchilarining va yo‘l harakati boshqa ishtirokchilarining mastligi yoki mast emasligini aniqlash uchun tekshiruvdan o‘tishdan bo‘yin tovlashi)lari bo‘yicha ma’muriy ish qo‘zg‘atilgan bo‘lsa.