Qayd etilishicha, baʼzi odamlar uy-joyi yoki chorvasi haqida bergan maʼlumotlari ortiqcha soliqqa tortishga sabab bo‘lishi mumkinligidan xavotir bildirgan. Qo‘mita aslo bunday holat yuzaga kelmasligini, barcha maʼlumotlarni maxfiy saqlash kafolatlanishini maʼlum qildi. 

“Aholi va qishloq xo‘jaligini ro‘yxatga olish jarayonida berilgan barcha maʼlumotlar qonunga asosan maxfiy saqlanadi hamda soliqqa tortish yoki tekshiruv o‘tkazish uchun ishlatilmaydi. Savolnomada ko‘rsatilgan javoblar boshqa idoralarga taqdim etilmaydi. Ro‘yxatga olishda to‘plangan maʼlumotlar faqat umumiy statistik tahlil uchun xizmat qiladi. Yaʼni, qancha yer bor, qancha chorva mavjud — bular alohida shaxs yoki xonadon kesimida emas, umumlashgan holda eʼlon qilinadi. Shu bois, savolnomani xavotirsiz va to‘liq to‘ldirishingiz mumkin”, deyiladi qo‘mita bayonotida.

Tushuntirilishicha, ro‘yxatga olishning maqsadi — mamlakatda aholi soni, turmush sharoiti, qishloq xo‘jaligi holati, yaʼni qaysi hududda qancha mahsulot yetishtiriladi va bu aholi ehtiyojini qoplaydimi, degan savollarga aniq javob olishdir. Shu asosda davlat oziq-ovqat xavfsizligini taʼminlash, qishloq xo‘jaligini qo‘llab-quvvatlash, infratuzilmani rivojlantirish hamda aholi uchun zarur ijtimoiy xizmatlarni to‘g‘ri rejalashtirish imkoniyatiga ega bo‘lishi bildirilgan.

O‘zbekistonda 15-yanvardan 31-yanvargacha aholi va qishloq xo‘jaligi onlayn shaklda ro‘yxatga olinadi. Jarayonda fuqarolar census.stat.uz saytiga kirib, 71 ta savolga javob berishi mumkin. Fevral oyida esa uyma-uy yurish orqali ro‘yxatga olish ishlari davom ettiriladi.

​Maʼlumot uchun, 17-yanvar soat 12:00 holatiga ko‘ra, census.stat.uz portali orqali respublikadagi jami xonadonlarning 19,4 foizi onlayn ro‘yxatdan o‘tgan.