Shuningdek, fuqarolarga ID-kartani birinchi marta rasmiylashtirishda elektron raqamli imzo (ERI) sertifikati beriladi. Tegishli qarorni davlat rahbari imzoladi.

Prezidentning “Ichki ishlar organlarining migratsiya va personallashtirish sohasidagi faoliyatini raqamlashtirish orqali sifat jihatidan yangi bosqichga olib chiqish chora-tadbirlari to‘g‘risida”gi qarori qabul qilindi.

Hujjatga ko‘ra, 1 fevraldan jismoniy shaxslarga ID-kartani birinchi marta rasmiylashtirishda uning chipiga kiritilgan elektron raqamli imzo (ERI) sertifikati beriladi. Ushbu xizmat bepul ko‘rsatiladi.

Shu bilan birga, fuqarolar “Elektron hukumat” tizimi foydalanuvchilarini identifikatsiya qilish yagona axborot tizimi (OneID)da avtomatik tarzda ro‘yxatdan o‘tkaziladi.

Mazkur choralar migratsiya va personallashtirish sohasida boshqaruv tizimini takomillashtirish, shuningdek, ushbu sohada raqamlashtirish jarayonlarini izchil davom ettirishga qaratilgan.