15-yanvardan O‘zbekistonda aholi va qishloq xo‘jaligini ro‘yxatga olishning onlayn bosqichi boshlandi. Fuqarolar census.stat.uz orqali so‘rovnomani to‘ldirishni boshladi. Statistika qo‘mitasi so‘rovnomani onlayn to‘ldirish jarayonida fuqarolarda paydo bo‘layotgan savollarga javoblar berib o‘tdi. Savollar va javoblar aslicha taqdim etiladi.

— Login va parol so‘ralyapti. Uni qayerdan olishim mumkin?

— Login va parol OneID tizimiga kirish jarayonida talab etiladi. Agar akkauntingiz mavjud bo‘lsa, avval o‘rnatilgan login va parolni kiriting. Agar unutgan bo‘lsangiz, JSHSHIR orqali tiklashingiz mumkin. Ilgari tizimdan foydalanmagan bo‘lsangiz, pasport ma’lumotlari asosida yangi akkaunt ochishingiz lozim. Bu bo‘yicha bizning rasmiy @census_2026 telegram kanalimizda videoqo‘llanma e’lon qilingan. Qolaversa, Mobile ID yoki elektron raqamli imzo orqali ham ro‘yxatdan o‘tishingiz mumkin.

— Oilamizdan bir kishi barchamizni ro‘yxatdan o‘tkazdi. Shu yetarlimi yoki barchamiz alohida qaytadan o‘tishimiz kerakmi?

— Bir kishi butun oilasini ro‘yxatdan o‘tkazishi mumkin. Ma’lumotlar to‘liq va to‘g‘ri taqdim etilsa, bu yetarli hisoblanadi.

— “Telefon qurilmasi talabga javob bermaydi” degan yozuv chiqyapti. Bu nimani anglatadi?

— Bu holatda telefoningizning operativ xotirasi kam yoki brauzeringiz eski bo‘lishi mumkin. Imkoni bo‘lsa, kompyuter yoki boshqa qurilmadan urinib ko‘ring.

— Mahalla/ko‘cha nomi chiqmayapti. Nima qilsam bo‘ladi?

— Bunday holatda siz mahalla/ko‘cha nomini mustaqil ravishda yozib qo‘yishingiz mumkin.

— Qaynota-qaynona, aka-uka, opa-singil va boshqalarni ham ro‘yxatga kiritishim kerakmi?

— Agar siz ular bilan birga yashamasangiz, ularni kiritishingiz shart emas. Ular o‘zlari yashab turgan turar joyi bo‘yicha alohida ro‘yxatdan o‘tishadi.

— 16 yoshgacha bo‘lgan qizlarda “Nechta farzand dunyoga keltirgansiz?” savolida “yo‘q” javobini belgilab bo‘lmayapti.

— Ushbu savol xalqaro tavsiyalarga muvofiq savolnomaga kiritilgan. Agar respondent farzandli bo‘lmagan bo‘lsa, “0” deb belgilashi mumkin.

— Ro‘yxatdan o‘tdim, lekin sertifikatimni yuklab ololmayapman.

— Agar siz ro‘yxatdan o‘tgan bo‘lsangiz, OneID tizimi orqali saytga kirib, o‘ng tomon yuqori qismda joylashgan ism-familiya ustiga bosgan holda sertifikatni yuklab olishingiz mumkin.

Shuningdek, sertifikatda aks etmagan oila a’zolarining ro‘yxatdan o‘tganligi to‘g‘risidagi ma’lumotlar tegishli tashkilotlarning monitoring dashbordlarida inson omilisiz aks etadi va buning o‘zi yetarli hisoblanadi, ulardan alohida sertifikat talab qilinmaydi.

— Savolnomada sotixni yoza olmayapman.

— 1-shaklning 2-savolida yakka tartibdagi xovli yoki kvartiraning umumiy qurilish maydoni kvadrat metrda butun sonlarda ko‘rsatiladi. 5-shaklda esa umumiy yer maydoni va qishloq xo‘jaligi yer maydoni sotixda ko‘rsatiladi. Umuman olganda, qishloq xo‘jaligi yer maydonlariga oid barcha ko‘rsatkichlar sotixda kiritilishi talab etiladi.

— Ishxonadan menga “bugun tezroq ro‘yxatdan o‘tib sertifikatingni ber, muddat tugadi”, deyishmoqda. Men bunga majburmanmi?

— Davlat organlari va tashkilotlari tizimida ishlayotgan xodimlar uchun onlayn ro‘yxatdan o‘tish belgilangan muddatlarda — 2026-yil 15-yanvardan 31-yanvarga qadar — ta’minlanishi prezident farmoni bilan nazarda tutilgan. Sertifikatni “bugunoq” topshirish talabi ortiqcha shoshilinch hisoblanadi, ammo davlat organi yoki tashkilot xodimi sifatida siz belgilangan davr ichida census.stat.uz portali orqali onlayn ro‘yxatdan o‘tishingiz kerak. Onlayn ro‘yxatdan o‘tgan xodimlar bo‘yicha ma’lumotlar tegishli tashkilotlarning monitoring dashbordlarida ko‘rinib turadi.

— Telegram'dan savolnomaga kirib bo‘lmayapti? Men uchun bu eng qulay tarmoq edi. Telegram’dagi link yoki QR kod orqali census.stat.uz portaliga kirsa bo‘ladimi?

— Ha, Telegram orqali berilgan havola (link) yoki QR-koddan foydalanib census.stat.uz portaliga o‘tish mumkin — bu platformaga kirishning qo‘shimcha va qulay usullaridan biri hisoblanadi. Biroq savolnomaning o‘zi Telegram ichida emas, balki rasmiy census.stat.uz veb-portalida to‘ldiriladi. Ya’ni Telegram faqat portalga o‘tish uchun vositachi kanal vazifasini bajaradi.

— Ro‘yxatdan o‘tish vaqtida daromadim qancha ekani haqida ma’lumot kiritishim kerakmi?

— Yo‘q. Daromad miqdori to‘g‘risidagi savollar ro‘yxatga olish savolnomasi tarkibida mavjud emas. Faqatgina daromad manbai (yollanma ish, pensiya, nafaqa, stipendiya, boquvchisini yo‘qotganlik nafaqasi) belgilanadi.

— Bizda qurilishi hali tugallanmagan turar joy mavjud. Ro‘yxatga olishda undagi yashash xonalari va turar joy maydoni ham hisobga olinadimi?

— Yo‘q, ro‘yxatga olish sanasiga qadar qurilishi tugallanmagan turar joylar va yashash xonalari ro‘yxatga olinmaydi. Ro‘yxatga olishda bino qachon foydalanishga topshirilgani va unda yashash qachondan boshlanganiga e’tibor qaratiladi. Shu asosda savolnoma to‘ldiriladi.

— Nega shaharda ko‘p qavatli uylarda yashaydiganlardan ham savolnomada qishloq xo‘jaligi bor yoki yo‘qligi so‘ralmoqda?

— Ayrim fuqarolarda shaharda yashashiga qaramay, qo‘shimcha ravishda yer yoki qishloq xo‘jaligi faoliyati mavjud bo‘lishi mumkin. Shu sababli savollar amaldagi holatdan kelib chiqqan holda to‘ldiriladi.

— Nega ro‘yxatga olish savolnomasida uy-joy va ko‘chmas mulkka oid uy nimadan qurilgani, uning holati va boshqa jihatlar bo‘yicha savollar ko‘p?

— Xalqaro amaliyotga ko‘ra, aholi va uy-joy fondini ro‘yxatga olish tadbirlari birgalikda o‘tkaziladi. O‘zbekistonda esa bunday keng qamrovli aholini ro‘yxatga olish tadbiri so‘nggi 37 yil davomida o‘tkazilmagan. Shu bois, savolnomaga uy-joy fondiga oid savollar ham kiritilgan. Savolnomadagi mazkur savollar Birlashgan Millatlar Tashkiloti Aholishunoslik jamg‘armasi va boshqa xalqaro tashkilotlarning tavsiyalari asosida, shuningdek xalqaro ekspertlar ishtirokida ishlab chiqilgan. Aynan ushbu ma’lumotlar asosida kelgusida uy-joy siyosatini shakllantirish, infratuzilmani rivojlantirish va kommunal xizmatlar sifatini yaxshilash bo‘yicha muhim qarorlar qabul qilinadi. Shu sababli savollar soni biroz ko‘p bo‘lishi — kelajakda aniq va ishonchli statistika shakllantirish uchun zarur.

— Savolnomani to‘ldirdim lekin sertifikat chiqmadi? Ishxonamdan sertifikat so‘rashmoqda?

— Savolnomani to‘ldirishda birinchi va uchinchi qatorda keltirilgan shakllar belgilansa, ya’ni O‘zbekiston Respublikasi hududida doimiy yashayotgan fuqarolar hamda 12 oy va undan ortiq muddat davomida O‘zbekiston hududida yashayotgan chet el fuqarolari uchun savolnomani to‘ldirish yakunida sertifikat chiqadi.

Agar siz ikkinchi va to‘rtinchi qatordagi shakllarni belgilab savolnomani to‘ldirsangiz sertifikat berilmaydi. Chunki unda maxsus va ijtimoiy muassasa hamda tashkilotlarda yashayotgan shaxslar, shuningdek, O‘zbekiston hududida 12 oydan kam muddatda bo‘lgan xorij fuqarolari uchun savolnoma ochiladi.

— Ochig‘i hovlimizda ekilayotgan qishloq xo‘jaligi mahsulotlari hamda qoramol, qo‘y-echki va parrandalar soni bo‘yicha ma’lumot berish ortiqcha soliqqa tortilishiga sabab bo‘lishidan qo‘rqayapman? Men soliqlarni vaqtida to‘lab kelayapman. Ro‘yxatga olishdan keyin ortiqcha soliq kelib chiqmaydimi?

— Aholi va qishloq xo‘jaligini ro‘yxatga olish — bu statistik tadbir bo‘lib, u soliq to‘lash bilan bog‘liq emas. Siz bergan ma’lumotlar faqat statistika uchun yig‘iladi. Soliq va boshqa organlarga taqdim etilmaydi.

Ro‘yxatga olishning maqsadi — mamlakatda aholi soni, turmush sharoiti, qishloq xo‘jaligi holati, ya’ni qaysi hududda qancha mahsulot yetishtiriladi va bu aholi ehtiyojini qoplaydimi, degan savollarga aniq javob olishdir.

Shu asosda davlat oziq-ovqat xavfsizligini ta’minlash, qishloq xo‘jaligini qo‘llab-quvvatlash, infratuzilmani rivojlantirish hamda aholi uchun zarur ijtimoiy xizmatlarni to‘g‘ri rejalashtirish imkoniyatiga ega bo‘ladi.

— Savolnomada uy xo‘jaligi raqamini keltirish kerak. Uy xo‘jaligi nima?

— Uy xo‘jaligi deganda bir uyda birga yashaydigan va umumiy ro‘zg‘or yuritadigan shaxslar guruhi tushuniladi. Ular qarindosh bo‘lishi ham, bo‘lmasligi ham mumkin. Uy xo‘jaligi bir kishidan ham iborat bo‘lishi mumkin. Agar sizning xonadoningizdagi oilalar daromad va xarajatlari, ya’ni, ro‘zg‘ori umumiy bo‘lsa uy xo‘jaliklari soniga bitta bo‘ladi.

— 2-shaklni to‘ldirish jarayonida mening kasbim nomi ro‘yxatdan chiqmadi? Nima qilishim kerak?

— Agar siz o‘z kasbingizni ro‘yxatdan topa olmasangiz, u holda “Boshqa kasbni tanlang” javob variantini belgilang hamda o‘zingiz kasb nomini aniq va to‘liq yozib ko‘rsatishingiz kerak.

— Nega sertifikatda 4−28-fevral kunlari qayta ro‘yxatdan o‘tkazilishi mumkinligi haqida ogohlantirish bor?

— Savolnomani to‘ldirish jarayonida ayrim savollarga noaniq, to‘liq bo‘lmagan yoki o‘zaro zid javoblar kiritilgan taqdirda ma’lumotlarni aniqlashtirish zarurati yuzaga kelishi mumkin. Shuningdek, ba’zi hollarda savolnoma shoshma-shosharlik bilan yoki faqat sertifikat olish maqsadida to‘liq to‘ldirilmasdan yuborilishi ehtimoli mavjud.

Ro‘yxatga olish jarayonida to‘plangan ma’lumotlar tuman, shahar va viloyatlar kesimida ijtimoiy-iqtisodiy siyosatni ishlab chiqish, hududlarni rivojlantirishni rejalashtirish, infratuzilmani yaxshilash hamda aholiga ko‘rsatiladigan xizmatlar sifatini oshirishda muhim ahamiyat kasb etadi. Shu bois ma’lumotlarning aniq va ishonchli bo‘lishi alohida ahamiyatga ega.

— Men ijarada yashayman. Yaqinda ijarachi menga telefon qilib ushbu manzildan ro‘yxatdan o‘tmang deb telefon qildi. Shunda men doimiy yashash joyimdan ro‘yxatdan o‘tamanmi?

— Agar siz ijarada yashayotgan bo‘lsangiz, aholi ro‘yxatidan ayni paytda yashab turgan — ya’ni ijaradagi manzilingiz bo‘yicha o‘tishingiz kerak. Ijarachining “bu manzildan ro‘yxatdan o‘tmang” degani ro‘yxatga olish talablarini bekor qilmaydi. Shaxs real qayerda yashayotgan bo‘lsa, o‘sha manzil bo‘yicha hisobga olinadi — mulk kimga tegishli ekani muhim emas.

Bu hududda haqiqiy aholi sonini; Ijtimoiy infratuzilmaga bo‘lgan real ehtiyojni (maktab, bog‘cha, shifoxona, transport) aniqlash uchun zarur.

Shu bois fuqarolardan savolnomani to‘liq, aniq va xolis to‘ldirishlarini, shuningdek, ushbu jarayon haqida yaqinlarini ham xabardor qilishlarini so‘raymiz. Ro‘yxatga olish belgilangan muddatlarda davom etadi.

— So‘rovnomani xatolik bilan to‘ldirgan bo‘lsam, qaytadan kiritishim mumkinmi?

— Ha. Agar ma’lumotlar xatolik bilan kiritilgan bo‘lsa, 31-yanvarga qadar qaytadan onlayn ro‘yxatdan o‘tish imkoniyati mavjud. Natijalarni qayta ishlash jarayonida tizim sizning to‘liq to‘ldirgan shaklingizni tanlab oladi.

— Men hozirda boshqa tumanda istiqomat qilaman, doimiy “propiskam” esa boshqa hududda. Savolnomada qaysi joyni kiritishim kerak?

— Ro‘yxatdan o‘tish jarayonida fuqaro aynan hozirgi vaqtda, ya’ni, ro‘yxatga olish davrida yashab turgan joyini ko‘rsatishi lozim.

— Chet eldagi oila a’zolarimizni ham ro‘yxatga kiritamizmi?

— Ha, hozirda ma’lum sabablarga ko‘ra xorijda vaqtincha bo‘lib turgan oila a’zolaringizni ham ro‘yxatdan o‘tkazishingiz mumkin. Shuningdek, ular o‘zlari boshqa davlatda bo‘lib turgan holatda ham census.stat.uz sayti orqali onlayn ro‘yxatdan o‘tishi mumkin.

— Qancha harakat qilsam ham census.stat.uz saytida xatolik yuz berdi deb chiqyapti. Nima qilsam bo‘ladi?

— Bu holat, asosan, sayt Telegram’ning ichki brauzeri orqali ochilganda kuzatilmoqda. Muammoni bartaraf etish uchun census.stat.uz saytini telefonda alohida internet brauzer orqali (Chrome, Mozilla, Opera yoki Google)dan ochib ko‘ring.