Adliya vazirligi “Umra plyus” ziyorat turizmi dasturi asosida Malayziya va Indoneziyadan sayyohlarni jalb qilayotgan turoperatorlarga har bir sayyoh uchun subsidiya ajratish tartibi to‘g‘risidagi nizomni (ro‘yxat raqami 3784, 04.03.2026 y.) davlat ro‘yxatidan o‘tkazdi.

Unga ko‘ra, Malayziya va Indoneziyadan umra ziyoratiga yo‘l olgan yoki undan qaytayotgan har bir sayyoh uchun mahalliy turoperatorlarga 100 AQSH dollari miqdorida subsidiya ajratiladi.

Subsidiya olish istagida bo‘lgan talabgorlar (turoperatorlar) Turizm qo‘mitasiga quyidagi tartibda murojaat qilishlari mumkin:

▫️ Davlat xizmatlari markazi (DXM) orqali;
▫️ YIDXP (my.gov.uz) orqali.

Subsidiya olish uchun ariza topshirish va ularni ko‘rib chiqish bepul amalga oshiriladi.

Ariza Turizm qo‘mitasi tomonidan 10 ish kunida ko‘rib chiqiladi.

Subsidiya ajratish to‘g‘risida qaror qabul qilingan taqdirda, talabgorga 5 ish kunida pul mablag‘lari o‘tkazib beriladi.

Quyidagi sayyohlar uchun subsidiya beriladi:

▫️ Malayziya yoki Indoneziyadan bo‘lishi;
▫️ Saudiya Arabistoniga umra safariga ketayotgan yoki qaytayotgan bo‘lishi;
▫️ O‘zbekistonda kamida 3 kecha tunab qolgan bo‘lishi kerak.

Subsidiyalar 2026 yil 31 dekabrga qadar ajratiladi.