Endilikda mobil raqamni boshqa shaxs nomiga o‘tkazish xizmati my.gov.uz orqali onlayn tarzda yo‘lga qo‘yildi.

Ariza yuborishda raqamning amaldagi egasi va yangi egasi uni MyID tizimi orqali tasdiqlashi kerak. Xizmat narxi mobil operatorning tarif siyosatiga qarab belgilanadi.

Avvalroq xabar qilinganidek, 22 apreldan bank ilovalarida ro‘yxatdan o‘tishda telefon raqami va PINFL mos kelmasa, rad etiladi. Yaʼni mobil ilovadan foydalanish uchun raqam o‘sha shaxs nomida rasmiylashtirilgan bo‘lishi shart.

Shu munosabat bilan Yagona interaktiv davlat xizmatlari portalida raqamni boshqa shaxsga qayta rasmiylashtirish xizmati ishga tushirildi.

Ilgari raqam egasini o‘zgartirish uchun har ikki tomon (amaldagi va yangi ega) mobil operator ofisiga shaxsan borishi talab etilardi.

Onlayn ariza topshirilganda esa har ikki tomon MyID orqali tasdiq berishi lozim.

Maʼlum qilinishicha, ushbu xizmat barcha mobil operatorlarda bosqichma-bosqich joriy etilmoqda. Xizmat ko‘rsatish muddati 1 kundan 5 kungacha bo‘lishi mumkin.

Ayrim operatorlarda yaqin qarindoshlar uchun mazkur xizmat bepul bo‘lishi ham mumkin.