Integratsiyalashgan dasturlar oliy maktabi tashkil etiladi

“Respublikada xalqaro taʼlim standartlari asosida o‘rta maxsus, kasbiy va oliy taʼlim dasturlarini joriy etishga doir qo‘shimcha chora-tadbirlar to‘g‘risida”gi Prezident qarori (PQ–269-son, 17.07.2026 y.) qabul qilindi.

Maʼlumot uchun: O‘zbekistonda integratsiyalashgan taʼlim dasturlarini joriy etish maqsadida Buyuk Britaniyaning “IQF – Integrated qualifications framework” taʼlim tashkiloti bilan hamkorlikda Xalqaro malakalar va baholash markazi (Markaz) tashkil etilgan.

Qarorga ko‘ra, Markazga quyidagi qo‘shimcha vazifalar yuklatildi:

♦ ishlab chiqilgan integratsiyalashgan dasturlarni QS (Quacquarelli Symonds) yoki THE (The Times Higher Education) xalqaro reyting tashkilotlari global reytingining top-100 talik ro‘yxatiga (top-100 talik ro‘yxat) kiruvchi hamkor oliy taʼlim tashkilotlarining akademik talablariga solishtirish va muvofiqlashtirish;

♦ top-100 talik ro‘yxatga kiruvchi hamkor oliy taʼlim tashkilotlari tomonidan tan olinadigan bakalavriatda “1+3”, “2+2”, magistraturada “1+1” kabi taʼlim modellarini ishlab chiqish;

♦ O‘zbekiston Respublikasida yetakchi xorijiy oliy taʼlim tashkilotlarining oliy maʼlumot to‘g‘risidagi diplomini berishga qaratilgan tuzilmalarni (kampus, filial, franshiza, taʼlim dasturlarini amalga oshirish markazlari va boshqalar) tashkil etish bo‘yicha kelishuvga erishish.

Buyuk Britaniya ilg‘or tajribasi asosida integratsiyalashgan taʼlim dasturlarini joriy qilishni yana-da kengaytirish maqsadida tajriba-sinov tariqasida Toshkent arxitektura-qurilish universiteti huzurida Integratsiyalashgan dasturlar oliy maktabi (Oliy maktab) tashkil etilishi belgilandi.

“El-yurt umidi” jamg‘armasi bilan hamkorlikda stipendiatlar uchun ajratiladigan mablag‘lar yana-da samarali yo‘naltiriladi

✅ Qarorga ko‘ra, Oliy maktab faoliyati Buyuk Britaniyaning nufuzli oliy taʼlim tashkilotlari andozasi asosida yo‘lga qo‘yiladi.

♦ Oliy maktab bilan texnikumlar hamkorligi yo‘lga qo‘yiladi. Bunda:

♦ integratsiyalashgan taʼlim dasturlari joriy etilgan texnikumlarda ushbu dasturlarni muvaffaqiyatli tamomlagan bitiruvchilarga Oliy maktabning tegishli bakalavriat taʼlim yo‘nalishida kirish imtihonlarisiz o‘qishni davom ettirishga ruxsat beriladi;

♦ integratsiyalashgan taʼlim dasturlari asosida tahsil olgan o‘quvchilarning kreditlari xorijiy yetakchi hamkor taʼlim tashkilotlari tomonidan tan olinishi taʼminlanadi.

☑️ “El-yurt umidi” jamg‘armasiga stipendiya dasturlari doirasida 2027/2028 o‘quv yilidan belgilangan tartibda tanlovdan o‘tgan talabgorlarning quyidagi xarajatlarini moliyalashtirishga ruxsat beriladi:

▫️ Oliy maktab va boshqa oliy taʼlim tashkilotlari tomonidan amalga oshiriladigan integratsiyalashgan taʼlim dasturlari asosida tahsil olayotgan, top-300 talik ro‘yxatga kirgan xorijiy oliy taʼlim tashkilotlarida, shuningdek, sohaviy yetakchi oliy taʼlim tashkilotlarida o‘qishni uzluksiz davom ettirish imkoniga ega bo‘lgan talabalarning xorijdagi o‘qishini tashkil etish bilan bog‘liq xarajatlarini;

▪️ belgilangan oliy taʼlim tashkilotlari bakalavriat taʼlim yo‘nalishiga shartli qabul qilingan talabgorlar uchun Oliy maktab va boshqa mahalliy oliy taʼlim tashkilotlarida integratsiyalashgan dasturlar asosida tashkil etiladigan 1-kurs (bosqich) (foundation) dasturlari o‘qish xarajatlarini (tuition fee).