O‘zgarishlar barcha tadbirkorlarga ham taalluqli bo‘lmaydi.

1-noyabrdan boshlab O‘zbekistonda so‘nggi ikki oy davomida to‘lov intizomiga rioya qilgan korxonalar uchun elektr energiyasi va tabiiy gaz bo‘yicha oldindan to‘lov miqdori kamaytiriladi. Bu Prezident farmonida nazarda tutilgan.

O‘zgarishlar elektr energiyasini nazorat qilish va hisobga olishning avtomatlashtirilgan tizimiga (ASKUE) hamda tabiiy gazni nazorat qilish va hisobga olishning avtomatlashtirilgan tizimiga (ASKUG) ulangan, masofadan o‘chirish (yoqish) funksiyasiga ega hisobga olish uskunalari o‘rnatilgan tadbirkorlik subyektlariga taalluqli bo‘ladi.

Ular uchun elektr energiyasi va tabiiy gazning oylik iste’moli bo‘yicha oldindan to‘lov miqdori 15 foiz etib belgilanadi.

Shuningdek, shu sanadan boshlab elektr energiyasi va gaz iste’moli to‘g‘risida hududiy elektr va gaz ta’minoti tashkilotlariga yozma hisobot taqdim etish majburiyati bekor qilinadi.

Bundan tashqari, iste’molchilarga elektr va gaz ta’minoti xizmatlarini ko‘rsatish bo‘yicha shartnomalarni qog‘oz shaklida rasmiylashtirish tartibi ham bekor qilinadi. Endilikda ushbu shartnomalar elektron shaklda tuziladi.