2026/2027 o‘quv yilidan Jamoat xavfsizligi universitetida qabul kvotalari oshiriladi, yangi ta’lim yo‘nalishlari joriy etiladi hamda dual ta’lim tizimi yo‘lga qo‘yiladi.

Prezidentning 2026-yil 26-avgustdagi PQ–302-son qaroriga muvofiq, 2026/2027 o‘quv yilidan Jamoat xavfsizligi universitetida ichki ishlar organlarining huquqbuzarliklar profilaktikasi, yo‘l harakati xavfsizligi, jamoat tartibini saqlash hamda qo‘riqlash faoliyati yo‘nalishlarida kadrlar tayyorlash tizimi takomillashtiriladi.

Qabul kvotalari

Universitetning yillik qabul kvotalari:

• bakalavriatning kunduzgi ta’lim shaklida 600 nafar kursantgacha;
• masofaviy ta’lim shaklida 300 nafar tinglovchigacha oshiriladi.

Bunda qabul kvotalarining to‘rtdan uch qismi Ichki ishlar vazirligi tizimi uchun jamoat xavfsizligini ta’minlash sohasida kadrlar tayyorlashga ajratiladi.

Ichki ishlar vazirligi tizimi uchun qabul kvotalari va mutaxassisliklar taqsimoti ichki ishlar organlarining ehtiyojidan kelib chiqib belgilanadi.

Ta’lim yo‘nalishlari

Bakalavriatning kunduzgi ta’lim shaklida quyidagi yo‘nalishlarda kadrlar tayyorlanadi:

• “Huquqbuzarliklar profilaktikasi faoliyati”;
• “Jamoat tartibini saqlash faoliyati”;
• “Yo‘l harakati xavfsizligi faoliyati”;
• “Qo‘riqlash faoliyati”.

Masofaviy ta’lim shaklida esa “Jamoat xavfsizligini huquqiy ta’minlash” yo‘nalishi bo‘yicha ta’lim tashkil etiladi.

Ichki ishlar organlari va Milliy gvardiyaning jamoat xavfsizligini ta’minlash sohasida kamida 5 yillik amaliy xizmat stajiga ega xodimlari va harbiy xizmatchilari magistraturaning “Jamoat xavfsizligini ta’minlash faoliyatini tashkil etish” mutaxassisligi bo‘yicha o‘qitiladi.

Ta’lim shakllari va moliyalashtirish

Qurolli Kuchlar va boshqa huquqni muhofaza qiluvchi organlar uchun mutaxassislar kunduzgi ta’lim shaklida davlat granti asosida tayyorlanadi.

Masofaviy ta’lim shaklida:

• Milliy gvardiya va ichki ishlar organlarining oliy ma’lumotga ega bo‘lmagan harbiy xizmatchilari va xodimlari — davlat granti asosida;
• oliy ma’lumotga ega harbiy xizmatchilar va xodimlar — to‘lov-kontrakt asosida o‘qitiladi.

Kadrlarni umumfuqaroviy asosda tayyorlash kunduzgi, kechki va masofaviy ta’lim shakllarida to‘lov-kontrakt asosida amalga oshiriladi.

Dual ta’lim tizimi

Universitetda dual ta’lim tizimi joriy etiladi.

Har bir kursant va tinglovchiga o‘qishni boshlaganidan uni tamomlagunga qadar bir nafar tajribali amaliyotchi-mutaxassis mentor-tyutor sifatida biriktiriladi.

Olimpiadalar va bitiruvchilar monitoringi

Har yili oliy harbiy va harbiylashtirilgan ta’lim tashkilotlari kursantlari o‘rtasida “Huquqshunoslik” fan olimpiadasi o‘tkaziladi.

G‘oliblarga xalqaro olimpiadalarda ishtirok etish imkoniyati beriladi.

Universitet ta’lim jarayonining sifat ko‘rsatkichlari va kelgusidagi strategiyasi bitiruvchilarning 5 yil davomidagi kasbiy o‘sishi hamda xizmat samaradorligi monitoringi natijalari asosida belgilanadi.

Shuningdek, har yili professor-o‘qituvchilar, ilmiy xodimlar, doktorantlar va magistrlardan kamida 30 nafari xorijiy ta’lim va ilmiy-tadqiqot muassasalariga malaka oshirish, stajirovka va tajriba almashish uchun yuboriladi.