Markaziy bank kredit qarzdorligini undirishda mijozning bank kartalaridagi mablag‘larni to‘liq yechib olishni cheklashni taklif qilmoqda. Yangi tartibga ko‘ra, mijoz hisoblarida kamida 680 ming so‘m saqlanib qolishi kerak bo‘ladi.

Markaziy bank kredit yoki kafillik bo‘yicha qarzdorlikni undirishda mijozning barcha bank kartalaridan mablag‘larni to‘liq yechib olish imkoniyatini cheklashni taklif qilmoqda. Tegishli loyiha jamoatchilik muhokamasiga qo‘yildi.

Hujjatga ko‘ra, kredit yoki kafillik bo‘yicha to‘lovlar mijozning topshirig‘isiz undirilganda, bank uning barcha bank kartalari hisoblarida eng kam ish haqining yarmi miqdorida mablag‘ qoldirishi kerak bo‘ladi.

Hozirda eng kam ish haqi 1 mln 360 ming so‘mni tashkil etadi. Uning yarmi — 680 ming so‘m. Demak, qarz undirilganda mijoz kartalarida kamida 680 ming so‘m qolishi lozim.

Ushbu talab shartnomada majburiy rekvizitlari ko‘rsatilgan va/yoki qarzdorlik bo‘yicha to‘lovlarni undirish uchun bankning mobil ilovasiga ulangan bank kartalariga nisbatan tatbiq etilmaydi.

O‘zgarishlarni bank xizmatlari iste’molchilari bilan munosabatlarda tijorat banklari faoliyatiga qo‘yiladigan minimal talablar to‘g‘risidagi nizomga kiritish rejalashtirilmoqda.

Avvalroq UZCARD avtomatik akseptsiz yechib olish xizmatidan foydalanish shartlarini o‘zgartirgan edi. Unga ko‘ra, 15-apreldan qarzdorlikni undirishda banklar mijoz kartasida kamida 3 BHM miqdoridagi kamaytirilmaydigan qoldiqni saqlashi kerak.

Biroq ushbu qoida faqat UZCARD to‘lov tizimi doirasida amal qiladi hamda mijoz bankka mustaqil ravishda taqdim etgan va OTP-kod orqali tasdiqlagan karta rekvizitlariga nisbatan qo‘llanilmaydi.

Markaziy bank endi bunday cheklovni tijorat banklari uchun umumiy normativ talab sifatida belgilashni taklif qilmoqda.

Loyiha bo‘yicha jamoatchilik muhokamasi 14-sentabrga qadar davom etadi.