Poytaxtda o‘quvchilarning maktabga qanday qatnashi va maxsus maktab avtobuslariga real ehtiyoj bor-yo‘qligini aniqlash boshlandi. Ota-onalardan olingan ma’lumotlar asosida bunday transport tizimini joriy etish imkoniyati baholanadi.

Toshkent shahri Yo‘l harakatini tashkil etish markazi poytaxtda maktab avtobuslarini yo‘lga qo‘yish imkoniyatini o‘rganish maqsadida ota-onalar o‘rtasida so‘rovnoma o‘tkazmoqda. Hozircha gap tizimni joriy etish to‘g‘risida qabul qilingan qaror haqida emas, balki unga bo‘lgan ehtiyojni aniqlash haqida ketmoqda.

So‘rovda farzandning yashash hududi, qaysi maktab va sinfda o‘qishi, uydan maktabga chiqish vaqti, hozirda foydalanayotgan transport turi hamda maktab avtobusiga ehtiyoj bor-yo‘qligi haqida ma’lumot kiritish so‘raladi.

Agar oilada maktab yoshidagi bir nechta farzand bo‘lsa, har bir bola bo‘yicha ma’lumot alohida taqdim etiladi. Markazning bildirishicha, so‘rov davomida shaxsiy ma’lumotlar yig‘ilmaydi va javoblar faqat umumlashtirilgan tahlil uchun ishlatiladi.

So‘rov natijalari o‘quvchilarning asosiy qatnov yo‘nalishlarini aniqlash, maktab avtobuslariga real talabni baholash va zarurat bo‘lsa, ularni yo‘lga qo‘yish masalasini ko‘rib chiqishga xizmat qiladi.

Poytaxtda maktab avtobuslarini tashkil etish masalasi avval ham ko‘tarilgan. 2025-yil avgustda shahar Kengashida bu tashabbus muhokama qilinganda, YHXX vakillari loyihani amalga oshirishdagi asosiy muammolardan biri sifatida o‘quvchilarning faqat yashash joyiga yaqin maktablarga qatnamasligini ko‘rsatgan edi. Ayrim bolalar poytaxtning boshqa tumanlaridan, hatto Toshkent viloyatidan kelib o‘qiydi.

Bu esa barcha bolalar uchun qulay yagona marshrutlarni shakllantirishni murakkablashtiradi. Shu sababli yangi so‘rov orqali, avvalo, o‘quvchilarning uy va maktab o‘rtasidagi haqiqiy harakat yo‘nalishlarini aniqlash ko‘zda tutilmoqda.

Hozirgi bosqichda Toshkentda maktab avtobuslari joriy etilishi aniq belgilanmagan. Yakuniy masala ota-onalarning ehtiyoji va so‘rov natijalari tahlil qilinganidan keyin ko‘rib chiqiladi.

Ma’lumot uchun, 2024-yilda Qashqadaryo va Surxondaryoning ayrim olis hududlarida o‘quvchilarni maktabga bepul tashish bo‘yicha maktab avtobuslari tajriba tariqasida yo‘lga qo‘yilgan edi.