AQShning Sietl shahrida O‘zbekiston Respublikasining Bosh konsulxonasi rasman ish boshladi. U Tinch okeani shimoli-g‘arbiy mintaqasidagi O‘zbekistonning birinchi konsullik muassasasi bo‘ldi.

Bosh konsulxonaning rasmiy ochilish marosimi 4-sentabr kuni bo‘lib o‘tdi. Muassasa amalda joriy yil mart oyidan buyon faoliyat yuritib kelayotgan edi.

Yangi diplomatik vakolatxonaning asosiy vazifalaridan biri AQShning g‘arbiy qismida yashayotgan O‘zbekiston fuqarolari va vatandoshlarga konsullik xizmatlarini yaqinlashtirish, shuningdek, ikki davlat o‘rtasidagi iqtisodiy va gumanitar aloqalarni kengaytirishdan iborat.

Sietldagi Bosh konsulxona savdo, investitsiya, texnologiya, ta’lim va xalqlararo aloqalarni rivojlantirishga xizmat qilishi kutilmoqda.

Muassasaga diplomat Axror Burxonov rahbarlik qilmoqda. U bungacha O‘zbekiston Tashqi ishlar vazirligi matbuot kotibi sifatida ishlagan, shuningdek, mamlakatning AQShdagi elchixonasida diplomatik faoliyat olib borgan.

Sietlda konsullik ochilishi O‘zbekistonning AQShdagi diplomatik ishtirokini kengaytirish bo‘yicha kattaroq rejaning bir qismi hisoblanadi. Filadelfiya, Chikago va Orlando shaharlarida ham konsullik muassasalarini tashkil etish ko‘zda tutilgan. Bu choralar AQSh–O‘zbekiston Biznes va investitsiya kengashini tashkil etish bo‘yicha qabul qilingan Prezident hujjati bilan bog‘liq.

Sietldagi muassasa ochilguniga qadar O‘zbekistonning AQShdagi asosiy diplomatik vakolatxonalari Vashingtondagi elchixona va Nyu-Yorkdagi Bosh konsulxonadan iborat edi.

Ma’lumotlarga ko‘ra, Vashington shtatida 3 mingdan ortiq O‘zbekistondan chiqqan aholi yashaydi va ularning katta qismi Sietl hamda uning atrofida istiqomat qiladi. Shu jihatdan yangi Bosh konsulxona mintaqa aholisi uchun konsullik xizmatlaridan foydalanish imkoniyatini ancha yengillashtiradi.