Global Peace Index 2026 natijalariga ko‘ra, O‘zbekiston 163 davlat orasida 37-o‘rinni egallab, Markaziy Osiyo mamlakatlari orasida eng yuqori natijani qayd etdi. Mamlakatning umumiy ko‘rsatkichi 1,726 ballni tashkil qildi.

Institute for Economics & Peace (IEP) e’lon qilgan Global Peace Index 2026 reytingida O‘zbekiston dunyo bo‘yicha 37-o‘rindan joy oldi. Indeks jami 163 davlat va hududni qamrab oladi.

O‘zbekistonning natijasi 1,726 ball bo‘ldi. GPI metodologiyasida ball qanchalik past bo‘lsa, mamlakatning tinchlik darajasi shunchalik yuqori hisoblanadi.

Markaziy Osiyo davlatlari orasida eng yuqori o‘rin O‘zbekistonga tegishli — 37-o‘rin. Qozog‘iston 44, Tojikiston 47, Qirg‘iziston 61, Turkmaniston esa 66-o‘rinni egallagan.

Shu tariqa, O‘zbekiston mintaqadagi barcha qo‘shni davlatlarni ortda qoldirgan. Ayni paytda IEP O‘zbekistonni Sharqiy Yevropa va Markaziy Osiyoni qamrab olgan kengroq mintaqada Bolgariyadan keyin ikkinchi o‘ringa joylashtirgan.

Jahon reytingida Islandiya 19 yildan beri birinchi o‘rinni saqlab kelmoqda. Keyingi o‘rinlarni Yangi Zelandiya, Shveytsariya, Sloveniya va Irlandiya egallagan. Reytingning so‘nggi o‘rnida Rossiya qayd etilgan, undan oldin Sudan, Kongo Demokratik Respublikasi, Ukraina va Isroil joylashgan.

Global Peace Index mamlakatlardagi vaziyatni 23 ta sifat va miqdoriy ko‘rsatkich asosida baholaydi. Ular jamoat xavfsizligi, davom etayotgan ichki va xalqaro mojarolar hamda militarizatsiya darajasi kabi uch asosiy yo‘nalishga birlashtirilgan.

2026-yilgi hisobot umumjahon miqyosida vaziyat salbiy tomonga o‘zgarayotganini ham ko‘rsatdi. O‘tgan bir yilda global tinchlik darajasi 0,7 foizga pasaygan. 163 davlatdan 99 tasida ko‘rsatkich yomonlashgan, 62 tasida esa yaxshilangan.

Ma’lumot uchun, 2025-yilgi Global Peace Index nashrida O‘zbekiston 1,926 ball bilan 67-o‘rinda qayd etilgan edi.