9-sentabrdan Xiva—Buxoro, 14–15-sentabrdan esa Buxoro—Toshkent yo‘nalishlarida yangi elektropoyezdlar harakati boshlanadi. Yangi qatnovlar munosabati bilan ayrim boshqa poyezdlar jadvaliga ham o‘zgartirishlar kiritiladi.

“O‘ztemiryo‘lyo‘lovchi” ma’lumotiga ko‘ra, Xitoyning CRRC Dalian kompaniyasida ishlab chiqarilgan yangi elektropoyezdlar 5 ta vagondan iborat bo‘lib, 415 nafar yo‘lovchiga mo‘ljallangan.

9-sentabrdan Xiva—Buxoro—Xiva yo‘nalishida muntazam qatnov boshlanadi.

707-sonli Xiva—Buxoro-1 poyezdi seshanba kunidan tashqari har kuni harakatlanadi. Poyezd Xivadan soat 09:55 da jo‘nab, Buxoroga 14:32 da yetib boradi.

Qaytish yo‘nalishidagi 706-sonli Buxoro-1—Xiva poyezdi esa dushanba kunidan tashqari har kuni harakatlanadi. U Buxorodan 15:45 da jo‘nab, Xivaga 20:25 da yetib keladi.

Buxoro va Toshkent o‘rtasida ham yangi qatnovlar joriy etiladi.

14-sentabrdan 701-sonli Buxoro-1—Toshkent poyezdi har dushanba kuni Buxorodan 15:17 da jo‘nab, Toshkentga 21:22 da yetib keladi.

15-sentabrdan 702-sonli Toshkent—Buxoro-1 poyezdi har seshanba kuni Toshkentdan 10:05 da jo‘nab, Buxoroga 15:17 da yetib boradi.

Yangi elektropoyezdlar qatnovi yo‘lga qo‘yilishi munosabati bilan bir qator amaldagi poyezdlarning harakat jadvali ham o‘zgaradi.

O‘zgarishlar Toshkent Janubiy—Xiva, Toshkent Janubiy—Shovot, Andijon—Qo‘ng‘irot, Dushanbe—Toshkent, Toshkent Janubiy—Xovos hamda Urganch—Nukus yo‘nalishlaridagi ayrim poyezdlarga taalluqli.

Yo‘lovchilarga safarni rejalashtirishdan oldin poyezdlarning yangilangan harakat jadvalini tekshirish tavsiya etiladi.