Автомобиль йўлларидан фойдаланиш тартиби

Фойдаланувчиларнинг ҳуқуқлари

Автомобиль йўлларидан фойдаланувчилар:

умумий фойдаланишдаги йўллардан;
шаҳарлар ва бошқа аҳоли пунктлари кўчаларидан;
бошқа шахслар фойдаланиши учун очиқ бўлган хўжалик йўлларидан ўтиш;
йил давомида хавфсиз ва қулай шароитда ҳаракатланиш;
йўл шароитлари ҳақида тезкор ахборот олиш;
йўлдаги носозлик сабабли етказилган зарарни белгиланган тартибда ундириш ҳуқуқига эга.

Фойдаланувчиларнинг мажбуриятлари

Йўлдан фойдаланувчилар:

ҳаракат хавфсизлигини таъминлайдиган техник ҳолатдаги транспорт воситасидан фойдаланиши;
йўл ва унинг ажратилган минтақасини ифлослантирмаслиги;
йўл қопламаси, белгилар, тўсиқлар ва бошқа элементларни шикастламаслиги шарт.

Йўл элементларини шикастлаган шахс қонунчиликда белгиланган жавобгарликка тортилади ҳамда шикастланган элементлар ва уларни тиклаш ишлари қийматини қоплайди.

Муҳим: йўлга чиқинди, қурилиш материали, тупроқ ёки ҳаракатга халақит берадиган бошқа нарсаларни ташлаб кетиш мумкин эмас.

Оғир ва йирик ўлчамли транспорт

Ўқига тушадиган юк, умумий оғирлиги ва ўлчамлари белгиланган меъёрлардан ошмайдиган транспорт воситаларининг йўлдан ўтишига рухсат берилади.

Меъёрдан ортиқ оғир ёки йирик ўлчамли транспорт воситасининг ҳаракати қонунчиликда белгиланган махсус тартибда амалга оширилади ва тегишли тўлов ундирилиши мумкин.

Рухсатнома мавжудлиги транспорт воситаси эгасини йўл элементларига етказилган зарарни қоплашдан озод қилмайди.

Йўл носозлиги сабабли зарар етказилганда

Чуқурлик, очиқ қолдирилган қудуқ, носоз тўсиқ ёки бошқа йўл нуқсони транспорт воситасига зарар етказса:

ҳодиса жойини хавфсиз тарзда фото ва видеога олиш;
йўл белгиси ва нуқсон жойлашувини қайд этиш;
тегишли ЙҲХХ органига хабар бериш;
зарар миқдорини тасдиқловчи ҳужжатларни сақлаш лозим.

Муҳим: зарарни ундириш учун йўлдаги нуқсон, етказилган зарар ва улар ўртасидаги сабабий боғланиш далиллар билан тасдиқланиши керак.

Автомобиль йўлларидан фойдаланиш тартиби «Автомобиль йўллари тўғрисида»ги Қонуннинг 17–20-моддалари билан белгиланган.