Маъмурий баённомани расмийлаштириш

Баённомада кўрсатиладиган маълумотлар

Маъмурий баённомада:

тузилган сана ва жой;
уни тузган мансабдор шахс ҳақидаги маълумотлар;
ҳуқуқбузарнинг шахсий маълумотлари;
ҳуқуқбузарлик содир этилган вақт, жой ва унинг мазмуни;
жавобгарликни белгиловчи норма;
гувоҳлар ва жабрланувчилар ҳақидаги маълумотлар;
ҳуқуқбузарнинг тушунтириши;
ишни ҳал қилиш учун зарур бошқа маълумотлар кўрсатилади.

Шахс баённомани имзолашдан бош тортса, бу ҳақда қайд киритилади. У баённома мазмуни бўйича тушунтириш, эътироз ва имзоламаслик сабабларини ёзиб қолдиришга ҳақли.

Йўл ҳаракати қоидабузарлиги бўйича электрон баённома

ЙҲХХ ходими баённомани қоидабузарлик содир этилган жойда планшет ёки компьютер орқали «E-ma’muriy ish» тизимида электрон шаклда расмийлаштиради.

Шахс биометрик ёки бошқа идентификация тизими орқали аниқланади. Электрон баённома электрон рақамли ёки электрон график имзо ҳамда QR-код билан тасдиқланади.

Қоғоз баённома:

ҳуқуқбузарлик кейинчалик аниқланганда;
иш жабрланувчининг аризаси билан қўзғатилганда;
алоқа тармоғи мавжуд бўлмаганда;
иш хусусияти қоғоз ҳужжатни талаб қилганда тузилади.

Бундай ҳужжат ҳуқуқбузарлик аниқланган куни сканер қилиниб, тизимга киритилиши керак.

Муҳим: ЙҲХХ ходимининг ҳайдовчидан жойида жарима олиши қатъиян тақиқланади.

Камера қайд этган ҳуқуқбузарлик

Махсус автоматлаштирилган камера қоидабузарликни қайд этганда маъмурий баённома тузилмайди. Жарима солиш тўғрисидаги қарор шахс иштирокисиз электрон шаклда чиқарилади.

Қарор нусхаси камера материаллари билан бирга қарор чиқарилганидан кейин 3 кун ичида буюртма почта жўнатмаси орқали юборилади.

Муҳим: баённомада ёки қарорда келтирилган ҳолатга рози бўлмасангиз, тушунтириш ва далилларни тақдим этиш ҳамда қарор устидан шикоят қилиш ҳуқуқига эгасиз.

Умумий тартиб Маъмурий жавобгарлик тўғрисидаги кодекс, йўл ҳаракатига оид электрон расмийлаштириш эса 2240-сон Йўриқнома билан белгиланган.

Мақола фойдали бўлдими?

Бўлимлар