Маиший чиқиндилар соҳасида хизмат кўрсатиш

Хизматларни кўрсатиш тартиби

Маиший чиқиндиларни тўплаш ва олиб чиқиб кетиш хизматлари туман ёки шаҳар ҳудуди белгиланган тартибда бириктирилган хизмат кўрсатувчи ташкилот томонидан амалга оширилади.

Жисмоний шахсларга хизматлар оммавий шартнома асосида кўрсатилади. Хизмат кўрсатувчи ташкилот унга ҳудуд бириктирилганидан кейин 5 иш куни ичида оммавий шартномага ҳаволани SMS орқали юбориши, уни расмий веб-сайти ва оммавий ахборот воситаларида эълон қилиши керак.

Алоҳида кўчмас мулкдан фойдаланувчи юридик шахслар ва якка тартибдаги тадбиркорлар билан шартнома махсус портал орқали юбориладиган оммавий оферта асосида тузилади. Оферта олинганидан кейин уни 15 кун ичида акцептлаш ёки рад этиш сабабини кўрсатиш лозим.

Алоҳида тўлов эвазига олиб чиқиладиган чиқиндилар

Қуйидаги чиқиндилар одатдаги мажбурий тўлов таркибига кирмайди ва келишилган нархда алоҳида тўлов эвазига олиб чиқилади:

суюқ маиший чиқиндилар;
йирик габаритли маиший чиқиндилар;
чорвачилик чиқиндилари;
қурилиш чиқиндилари ва тупроқ;
дарахт ва буталарни кесиш ҳамда агротехник ишлов беришдан ҳосил бўлган чиқиндилар;
барглар, шох-шаббалар, кесиш қолдиқлари ва кўча смёти.

Йирик габаритли ва қурилиш чиқиндиларини оддий маиший чиқинди контейнерларига ташлаш мумкин эмас. Улар махсус ажратилган жойга жойлаштирилиши ва алоҳида буюртма асосида олиб чиқилиши керак.

Хизматлар учун тўлов

Истеъмолчилар хизматлар учун мажбурий тўловларни ҳар ойнинг 10-санасидан кечикмай тўлайди. Тўлов нақд ёки нақдсиз шаклда, банклар, тўлов кассалари, электрон тўлов тизимлари ва бошқа қонуний усуллар орқали амалга оширилиши мумкин.

Истеъмолчи 12 ойдан ошмайдиган давр учун олдиндан тўлов қилиши мумкин. Шу даврда тариф ошса, олдиндан тўланган сумма қайта ҳисоб-китоб қилинмайди.

Тўлов кечиктирилганда:

юридик шахслардан — қарздорликнинг ҳар бир кечиктирилган куни учун 0,4 фоиз;
жисмоний шахслардан — 0,1 фоиз миқдорида пеня ундирилади.

Пенянинг умумий миқдори қарздорлик суммасининг 50 фоизидан ошмайди.

Қайта ҳисоб-китоб қилиш

Тўловлар қуйидаги ҳолатларда қайта ҳисоб-китоб қилинади:

ҳисоблашда хатоликка йўл қўйилганда;
хизмат амалда кўрсатилмаганда ёки тегишли сифатда кўрсатилмаганда;
рўйхатдан ўтган шахслар сонига қонуний асосда тузатиш киритилганда;
суд қарори мавжуд бўлганда;
истеъмолчининг яшаш ёки вақтинча турган жойида бўлмаганлиги ҳужжатлар билан тасдиқланганда;
юридик шахснинг фаолияти вақтинча ёки бутунлай тўхтаган даврда.

Қайта ҳисоб-китоб тасдиқловчи ҳужжатлар асосида амалга оширилади. Хизмат амалда кўрсатилмаган бўлса, «маҳалла еттилиги» томонидан далолатнома тузилиши мумкин.

Хизмат кўрсатилмаган давр учун тўлов ҳисобланган бўлса, истеъмолчи далолатнома тузиш ва ҳисобланган суммани бекор қилишни талаб қилишга ҳақли.

Ушбу тартиб Вазирлар Маҳкамасининг 2019 йил 6 февралдаги 95-сон қарори билан тасдиқланган қоидаларда белгиланган.