Кассация инстанциясида иш юритиш

Кассация шикояти бериш ҳуқуқи

Қуйидагилар кассация шикояти беришга ҳақли:

ишда иштирок этувчи шахслар;
ишга жалб қилинмаган, аммо ҳуқуқ ва мажбуриятлари ҳақида суд қарор қабул қилган шахслар;
қонунда белгиланган ҳолларда Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил.

Кассация шикояти биринчи инстанция судининг қонуний кучга кирган ва апелляция тартибида кўрилмаган ҳал қилув қарори устидан берилади.

Прокурор ёки юқори турувчи прокурор прокурор иштирок этган иш, прокурорнинг иштироки мажбурий бўлган, аммо у тегишли хабардор қилинмаган иш ёки манфаатдор шахснинг мурожаати мавжуд бўлган ҳолда кассация протести келтириши мумкин.

Кассация шикоятини кўрадиган суд

Туманлараро иқтисодий судлар, Қорақалпоғистон Республикаси суди, вилоятлар ва Тошкент шаҳар судларининг ҳал қилув қарорлари устидан берилган кассация шикоятлари тегишли ҳудудий суднинг иқтисодий ишлар бўйича судлов ҳайъати томонидан кўрилади.

Олий суд биринчи инстанцияда қабул қилган ҳал қилув қарорлари устидан берилган кассация шикоятлари Олий суднинг Иқтисодий ишлар бўйича судлов ҳайъати томонидан кўрилади.

Шикоятни бериш тартиби

Кассация шикояти кассация инстанцияси суди номига йўлланади, аммо ҳал қилув қарорини қабул қилган судга топширилади.

Биринчи инстанция суди шикоятни иш билан бирга у келиб тушган кундан бошлаб 5 кун ичида кассация инстанциясига юбориши шарт.

Шикоятда:

кассация судининг номи;
шикоят берувчи ва бошқа иштирокчилар ҳақидаги маълумотлар;
шикоят қилинаётган суд ҳужжати;
қарорнинг нотўғрилигига асос бўлган важлар;
шикоят берувчининг талаби;
илова ҳужжатлар рўйхати кўрсатилади.

Кассация шикояти бериш муддати

Кассация шикояти ҳал қилув қарори қонуний кучга кирган кундан бошлаб 6 ой ичида берилиши мумкин.

Ўтказиб юборилган муддат шикоят берувчининг илтимосномасига кўра тикланиши мумкин. Бунинг учун:

илтимоснома кассация муддати ўтган кундан бошлаб 3 ой ичида берилиши;
муддатни ўтказиб юбориш сабаблари суд томонидан узрли деб топилиши керак.

Муҳим: Биринчи инстанция қарори апелляция тартибида кўрилган бўлса, у амалдаги тартибда кассацияга эмас, тегишли шартлар асосида тафтиш тартибида қайта кўриб чиқилади.

Суд ҳужжати ижросини тўхтатиш

Кассация шикоятининг берилиши ҳал қилув қарори ижросини автоматик равишда тўхтатмайди.

Ишда иштирок этувчи шахснинг илтимосномасига кўра кассация суди ҳал қилув қарори ижросини кассация иши якунлангунига қадар тўхтатиб туриши мумкин. Бу ҳақда шикоятни иш юритишга қабул қилиш тўғрисидаги ажримда кўрсатилади.

Тартиб Ўзбекистон Республикасининг Иқтисодий процессуал кодекси билан белгиланган.